مقدمہ بدنیتی پر مبنی، شہباز گل کی جانب سے عدالت میں ضمانت کیلئے درخواست دائر

اسلام آباد: پاکستان تحریکِ انصاف کے سینئر مرکزی رہنما و سابق معاونِ خصوصی ڈاکٹر شہباز گل کی جانب سے عدالت میں ضمانت کیلئے درخواست دائر کی گئی ہے جس میں مؤقف اپنایا گیا کہ ان کے خلاف مقدمہ بدنیتی پر مبنی ہے۔

تفصیلات کے مطابق سابق معاونِ خصوصی اور بنی گالہ کے موجودہ چیف آف اسٹاف شہباز گل نے اپنی قانونی ٹیم بشمول وکیل فیصل چوہدری کے توسط سے سیشن کورٹ اسلام آباد میں ضمانت کیلئے درخواست دائر کردی۔

یہ بھی پڑھیں:

عمران خان کااسلام آباد مارچ، عدالت میں پیشی آج، گرفتاری کا خدشہ

سیشن کورٹ کو دی گئی درخواست میں پی ٹی آئی رہنما شہباز گل نے مؤقف اپناتے ہوئے کہا کہ میرے خلاف بدنیتی اور سیاسی بغض کی بنیاد پر مقدمہ قائم کیا گیا۔ استغاثہ نے میرے بیان کے کچھ حصے توڑ مروڑ کر پیش کیے۔

سابق معاونِ خصوصی کی درخواست میں کہا گیا کہ شہباز گل کے بیان کے کچھ حصوں کو خلط ملط کرکے مقدمے کے متن کا حصہ بنا دیا گیا جبکہ وہ اعلیٰ ترین جامعات سے فارغ التحصیل اور تعلیم دینے والے کے طور پر شہرت رکھتے ہیں۔

شہباز گل نے کہا کہ میں امریکا اور یورپ کی درسگاہوں میں تعلیم دیتا رہا، میرے خلاف درج ایف آئی آر میں موجود دفعات کے تحت مقدمہ بے بنیاد ہے۔ درخواست کرتا ہوں کہ مجھے عدالت بدنیتی پر قائم کردہ مقدمے میں ضمانت منظور کرے۔

گزشتہ روز ہی عدالت نے جوڈیشل ریمانڈ پر پی ٹی آئی رہنما شہباز گل کو جیل بھیج دیا تھا۔ بیماری کے باعث سانس لینے میں مشکلات کا شکار شہباز گل پر اپنی تقریر کے دوران اداروں کے خلاف  بغاوت پر اکسانے کا الزام عائد کیا گیا ہے۔