پی آئی اے سے متعلق سینیٹر سلیم مانڈوی والا کے بیان پر پی آئی اے کا ردعمل

اسلام آباد: پی آئی اے سے متعلق سینیٹر سلیم مانڈوی والا کے بیان پر پی آئی اے کا ردعمل سامنے آگیا، ترجمان پی آئی اے کا کہنا ہے کہ سینیٹر سلیم مانڈوی والا کا پی آئی اے سے متعلق بیان حقائق کے منافی ہے۔

ترجمان پی آئی اے نے کہا کہ قومی سطح کے رہنماؤں کو حقائق کی جانچ کرنے کے بعد ایسے بیانات جاری کرنے چاہئیں تاکہ قومی اداروں کے ساکھ متاثر نہ ہو۔

انہوں نے کہا کہ 12 بوئنگ 777 میں سے 8 طیارے محو پرواز ہیں، 2 بوئنگ 777 کی مینٹینس کا عمل جاری ہے، فنڈز کا اجرا کیا جاچکا ہے اور یہ طیارے اگست کے آخر تک آپریشنل ہو جائیں گے۔

2 بوئنگ 777 دو سال سے طویل المدتی گراونڈنگ پر ہیں جن کے لئے نئے انجنوں کے حصول کیلئے خطیر فنڈز درکار ہیں، نئی حکومت فنڈز کی دستیابی کا بندوبست کررہی ہے، فنڈز ملتے ہی ان جہازوں کی بحالی اور قومی بیڑے میں شمولیت کا عمل شروع ہوجائے گا۔

ترجمان پی آئی اے نے کہا کہ کسی بھی بوئنگ 777 کو سکریپ نہیں کیا گیا،ائیر ایشیا سے لیز پر حاصل کئے گئے دو ائیربس 320 یقینا نو ماہ سے جکارتہ میں موجود ہیں۔

موجودہ حکومت نے آتے ہی لیزنگ کمپنی کے معیار کے مطابق ان طیاروں کی واپسی کے عمل کا آغاز کروایا اور اس ضمن میں کوئی فالتو پیسے نہیں ادا کئے گئے۔

2021 میں لیز کی مدت ختم ہونے والے 6 ائیربس 320 کو نہایت کم داموں میں لیزنگ کمپنی سے خرید لیا گیا، ان جہازوں کی واپسی کیلئے درکار رقم سے بہت کم قیمت پر ان طیاروں کو پی آئی اے کیلئے حاصل کیا گیا۔

انہوں نے کہا کہ ان طیاروں میں سے 5 طیارے قومی فریضے کی ادائیگی میں مشغول ہیں جبکہ ایک طیارہ پرزہ جات کی دستیابی کیلئے رکھا گیا ہے جو کہ سیفٹی اور ائیر وردینس کے معیار کے عین مطابق ہیں۔

یہ طیارے پی آئی اے کی ملکیت میں 2033 تک قومی ہوابازی پالیسی کے تحت آپریشن سرانجام دیتے رہیں گے، نئے آنے والا ائیربس 320 کل صبح اپنی پہلی پرواز اسلام آباد سے سکردو آپریٹ کرے گا۔

ترجمان پی آئی اے نے مزید کہا کہ دوسرا جہاز اس وقت شارجہ میں موجود ہے اور اگلے ہفتے پاکستان پہنچ جائے گا، نئے آنے والے طیاروں کی پیشگی کسٹم کلیئرنس حاصل کی جاچکی ہے اور وہ آتے ہی پروازیں آپریٹ کریں گے۔

حکومت پی آئی اے کی بحیثیت قومی اثاثے کی بحالی کیلئے پرعزم ہے اور اس سلسلے میں سنجیدہ اقدامات اٹھائے جارہے ہیں