میری شادی کو 18 سال نہیں ہوئے تو بچی کیسے 18 سال کی ہو گئی، والد دُعا زہرہ

کراچی کےعلاقے ملیر الفلاح سوسائٹی سے لاپتہ ہونے والی دُعا زہرہ کے ویڈیو بیان سامنے آنے کے بعد اُس کے والد کا کہنا ہے کہ 7 مئی 2005ء کو میری شادی ہوئی، میری شادی کو 18 سال نہیں ہوئے تو بچی کیسے 18 سال کی ہو گئی۔

دُعا زہرہ کے والد نے میڈیا سے گفتگو میں کہا کہ میری درخواست ہے کہ بچی کو کراچی واپس لایا جائے، بچی کو اگر میرے پاس نہیں تو چائلڈ پروٹیکشن کے حوالے کیا جائے۔

مہدی کاظمی کا کہنا تھا کہ ابھی تو میری شادی کو 18 سال نہیں ہوئے، مکمل تفتیش کی جائے تاکہ معلوم ہو کہ اصل معاملہ کیا ہے۔

انہوں نے کہا کہ 7 مئی 2005ء کو میری شادی ہوئی، میری شادی کو 18 سال نہیں ہوئے تو بچی کیسے 18 سال کی ہو گئی، میرے پاس بچی کا 27 اپریل 2008ء کا برتھ سرٹیفکیٹ ہے۔

بعدازاں انہوں نے الزام عائد کیا کہ میری بیٹی سے جو کہلوایا جارہا ہے وہ اسی طرح بول رہی ہے، گیم کے اندر میسیجنگ سسٹم سے لڑکے نے میری بیٹی کو ٹریپ کیا۔

مہدی کاظمی نے مزید کہا کہ وزیرِ اعلیٰ سندھ مراد علی شاہ اور آئی جی سندھ سے درخواست ہے کہ بچی کو کراچی لایا جائے، مجھے چائلڈ پروٹیکشن بیورو پر مکمل اعتماد ہے، بچی ان کےحوالے کی جائے۔

دعا زہرہ کے والد نے یہ بھی کہا کہ بچی کو چائلڈ پروٹیکشن بیورو کے حوالے کر کے معاملے کی  مکمل شفاف تفتیش کی جائے۔

مزید برآں اس موقع پر دُعا زہرہ کی والدہ کا کہنا تھا کہ بچی کا نکاح جس نے پڑھایا اُس کی مہر نکاح نامے پر نہیں، بچی کا نکاح نامہ جعلی ہے۔

یہ بھی پڑھیں: ڈاکوؤں اور پولیس کے درمیان فائرنگ کا تبادلہ، معصوم بچہ جان کی بازی ہارگیا

اُن کا مزید کہنا تھا کہ بیٹی کا نکاح جس نے پڑھایا ہے اُس نے بھی اس حوالے سے انکار کردیا، میں وکیل کی بیٹی ہوں اتنا قانون تو میں بھی جانتی ہوں،ان لوگوں نے اس لئے بچی کو ظاہر کردیا کیونکہ انہوں نے دیکھ لیا تھا کہ اب وہ بچی کو اور چھپا نہیں سکتے۔

خیال رہے کہ کراچی کے علاقے ملیر الفلاح سوسائٹی سے لاپتہ ہونے والی دُعا زہرہ ویڈیو بیان سامنے آگیا، جس میں اُس کا کہنا ہے کہ میں نے اپنی مرضی سے ظہیر احمد سے شادی کی، میرے گھر والے مجھے مارتے تھے، زبردستی کسی اور سے شادی کرانا چاہتے تھے جس پر میں راضی نہیں تھی۔

ویڈیو پیغام میں دعا زہرہ کا یہ بھی کہنا ہے کہ میرے گھر والوں نے میری عمر غلط بتائی ہے، میں 14 سال کی نہیں، بالغ ہوں، میری عمر 18 سال ہے۔