ڈی آئی جی ناصر آفتاب کے قتل کا منصوبہ، مارنے کا ٹاسک کس کو ملا ؟

کراچی: سابق پولیس انسپکٹر چاند نیازی قتل کیس کی تحقیقاتی رپورٹ تیار کرلی ، ڈی آئی جی ناصر آفتاب کے قتل کے منصوبے کا انکشاف،روپوش ٹارگٹ کلر کو مارنے کا ٹاسک مل گیا۔

سابق پولیس انسپکٹر چاند نیازی قتل کیس کی تحقیقاتی رپورٹ میں ارشد پپو گینگ اور چاند خان نیازی قتل کے محرکات شامل کیے گئے ہیں۔

رپورٹ کے مطابق چاند خان نیازی قتل میں ارشد پپو کا بیٹا عالم گرفتار ہوچکا ہے۔عالم کے ساتھ قتل میں اس کا خالہ زاد آذان بھی ملوث تھا، ملزم آذان کے ایران فرار ہونے کی اطلاعات ہیں۔

ملزم آذان کا والد عنایت بھی گینگ وار میں قتل ہوچکا ہے جبکہ ملزم آذان 2019 میں پولیس کے ہاتھوں گرفتار ہوچکا ہے۔

ارشد پپو گروہ کی سربراہی بلال عرف حمزہ کررہا ہے، گروہ میں اس وقت 10 سے زائد اہم کمانڈر شامل ہیں۔انسپکٹر جاوید بلوچ کو طلحہ عرف جہانگیر نے قتل کیا تھا۔

مزید پڑھیں:کراچی کے 13 پولیس اہلکار سنگین جرائم میں ملوث، ایس پی سکیورٹی رینج نے خط لکھ دیا

طلحہ عرف جہانگیر مبینہ طور پر گلستان جوہر میں روپوش ہے، کمانڈر جان محمد ڈی آئی جی ناصر آفتاب کو ٹارگٹ کرنا چاہتا ہے۔ جان محمد افغانستان سے تربیت لے چکا ہے، ارشد پپو گینگ کا اسلحہ بھی سنبھالتا ہے۔

جان محمد ارشد پپو کے بھائی کا بدلہ ڈی آئی جی ناصر آفتاب سے لینا چاہتا ہے۔ارشد پپو کا دوسرا بیٹا غازی عرف ساحل بھی ایران میں ہے، یعقوب عرف ماما کا نام ریڈ بک میں بھی شامل ہے۔ارشد پپو گینگ کے کارندے کراچی، بیلا، حب اور ایران میں موجود  ہیں۔