وزیر اعظم کے سابق ترجمان ندیم افضل چن دوبارہ پیپلز پارٹی میں شامل ہوگئے

لاہور: وزیر اعظم عمران خان کے سابق ترجمان ندیم افضل چن نے پاکستان پیپلز پارٹی کے چیئرمین بلاول بھٹو زرداری سے ملاقات کے بعد دوبارہ پاکستان پیپلز پارٹی (پی پی پی) میں شمولیت اختیار کر لی۔

بلاول بھٹو نے ندیم افضل چن کو پارٹی میں خوش آمدید کہتے ہوئے کہا کہ پیپلز پارٹی ان کا گھر ہے اور انہیں پیپلز پارٹی میں ہمیشہ خوش آمدید کہا جائے گا۔

پی پی پی چیئرمین نے کہا کہ منتخب وزیراعظم کو لانگ مارچ کے اسلام آباد پہنچنے سے پہلے ہی گھر بھیج دیا جائے گا۔ جبکہ ندیم افضل چن نے کہا کہ پی ٹی آئی عوام کی توقعات پر پورا اترنے میں ناکام رہی ہے۔

ندیم افضل چن اپریل 2018 میں تحریک انصاف کے چیئرمین عمران خان سے ملاقات کے بعد پاکستان تحریک انصاف (پی ٹی آئی) میں شامل ہونے سے قبل پی پی پی پنجاب کے سیکرٹری جنرل رہ چکے ہیں۔

تاہم رواں سال 14 جنوری کو انہوں نے مائیکروبلاگنگ ویب سائٹ ٹوئٹر پر وزیراعظم کے ترجمان کے عہدے سے استعفیٰ دینے کا اعلان کیا۔

ندیم افضل چن نے گزشتہ سال جنوری میں پی ٹی آئی حکومت سے اختلافات پر وزیراعظم عمران خان کے ترجمان کے عہدے سے استعفیٰ دے دیا تھا۔

مزید پڑھیں: تحریکِ عدم اعتماد، اپوزیشن عوامی حمایت سے محروم ہے۔فواد چوہدری

ذرائع کے مطابق پاکستان مسلم لیگ نواز (پی ایم ایل این) بھی چاہتی تھی کہ ندیم افضل چن ان کی پارٹی میں شامل ہوں۔ وزیر اعظم کے سابق ترجمان نے ساری صورتحال پر غور کے بعد پیپلز پارٹی میں واپسی کا فیصلہ کیا ہے۔