ڈاکٹر کشمالہ امجد پاکستان کی پہلی خاتون سرجیکل آنکالوجسٹ بن گئیں

 پشاور کی ڈاکٹر کشمالہ امجد نے سرجیکل آنکالوجی میں دوسری فیلوشپ کا امتحان پاس کرکے پاکستان کی پہلی خاتون سرجیکل آنکالوجسٹ بننے کا اعزاز حاصل کرلیا ہے جو کینسر کے مریضوں کا علاج کرسکیں گی۔

تفصیلات کے مطابق دنیا بھر میں سرطان کی درجنوں اقسام نے عالمِ انسانیت کی زندگی اجیرن کر رکھی ہے۔ سرجیکل انکالوجی میڈیکل سائنس کی وہ شاخ ہے جو کینسر کے علاج کیلئے جراحی کو اپنا طریقۂ علاج قرار دیتی ہے۔

یہ بھی پڑھیں:

وزیر اعظم کا اسکالر شپ کمپلینٹ سیل کی افتتاحی تقریب سے خطاب 

سرجیکل آنکالوجسٹ مریض کے جسم میں موجود سرطان زدہ خلیات تلاش کرکے انہیں جسم سے نکال پھینکتا ہے۔ ڈاکٹر کشمالہ امجد نے آغا خان یونیورسٹی ہسپتال کراچی سے جنرل سرجری کی تعلیم مکمل کرنے کے بعد شوکت خانم میموریل ہسپتال کا رخ کیا۔

وزیر اعظم عمران خان کے شوکت خانم میموریل ہسپتال سے ڈاکٹر کشمالہ امجد نے سرجیکل آنکالوجی میں دوسری فیلو شپ کا امتحان پاس کرکے پاکستان کی پہلی خاتون سرجیکل آنکالوجسٹ بننے کا اعزاز حاصل کیا جس پر ان کے اہل خانہ بے حد مسرور ہیں۔

ڈاکٹر کشمالہ امجد کے اہل خانہ کے مطابق گھر کی بیٹی نے ملک و قوم کا سر فخر سے بلند کیا۔ تربیتی مراحل کے دوران ڈاکٹر کشمالہ امجد خوراک کی نالی، معدے، لبلبے، پتے، گردے اور جگر کے کینسر کا علاج بھی کرچکی ہیں۔

مستقبل میں سرجیکل آنکالوجی کو اپنا میدان قرار دینے والی ڈاکٹر کشمالہ امجد ملک بھر کیلئے ایک بڑی مثال ہیں۔ ہر سال کینسرکے باعث ہزاروں افراد لقمۂ اجل بن جاتے ہیں۔  سرطان کے علاج کیلئے پاکستان کو مزید ڈاکٹرز کی ضرورت ہے۔