دُنیا بھر میں کینسر کی روک تھام کیلئے عالمی دن آج منایا جارہا ہے

جنیوا: پاکستان سمیت دنیا بھر میں کینسر کی روک تھام کیلئے عالمی دن آج منایا جارہا ہے جس کا مقصد سرطان جیسے موذی مرض کے خلاف شعور و آگہی بیدار کرنا ہے۔

تفصیلات کے مطابق اقوامِ متحدہ کے تحت عالمی ادارۂ صحت دنیا بھر میں کینسر کے خلاف شعور و آگہی کو فروغ دینے کیلئے پر عزم ہے۔ رواں برس کینسر کے عالمی دن کا مرکزی خیال نگہداشت کے فرق کو ختم کرنا ہے جبکہ کینسر کا علاج دیگر امراض کے مقابلے میں مشکل اور مہنگا ہے۔

یہ بھی پڑھیں:

نابینا افراد کا ذریعۂ تعلیم، چھو کر محسوس کی جانیوالی زبان بریل کا عالمی دن

خوش قسمتی سے سرطان کے مریضوں کی معیاری دیکھ بھال کو ان ممالک تک پہنچانے کیلئے اقدامات اٹھائے جارہے ہیں جو تاحال کینسر کے مریضوں کو خاطر خواہ طبی سہولیات فراہم نہیں کرپارہے۔ عالمی ادارۂ صحت خواتین میں سب سے عام چھاتی کے کینسر کے خاتمے کیلئے کوشاں ہے۔

 طبی ماہرین کا کہنا ہے کہ کینسر جسمانی بافتوں یا اعضاء میں خلیات کی غیر معمولی نشوونما کے باعث پیدا ہوتا ہے۔ دنیا بھرمیں انسانی اموات کی دوسری سب سے بڑی وجہ کینسر ہے۔ براعظم ایشیاء اور امریکا سمیت دنیا بھر میں کینسر کے کیسز میں اضافہ ہورہا ہے۔

ماہرینِ صحت کا کہنا ہے کہ کینسر کی بنیادی اور سب سے اہم وجہ غیر صحت مندانہ خوراک، ورزش نہ کرنا اور غیر متحرک طرزِ زندگی ہے جو موٹاپے، قلبی امراض اور کینسر سمیت دیگر متعدد امراض جبکہ پھلوں اور سبزیوں کے مقابلے میں گوشت کا زیادہ استعمال بھی سرطان کا سبب ہے۔