وزیراعلیٰ پنجاب کا وزیراعظم کو وزراء کی کارکردگی پر بریفنگ لطیفے کے مترادف ہے،عظمیٰ بخاری

لاہور :مسلم لیگ (ن) پنجاب کی سیکرٹری اطلاعات عظمیٰ بخاری نے کہا ہے کہ وزیراعلیٰ پنجاب کی جانب سے وزیراعظم کو وزراء کی کارکردگی پر بریفنگ لطیفے کے مترادف ہے۔

عمران خان کے ہردورے پر پنجاب کے وزراء وزیراعظم کو وزیر اعلیٰ کے شکائتیں لگاتے ہیں۔عمران خان نے بہتر کارکردگی نہ دیکھانے والے وزیر کو کابینہ سے نکالنے کا وعدہ کیا تھا۔14ماہ بعد بھی کسی صوبائی وزیر کو غیر تسلی بخش کارکردگی کی بناء پر کابینہ سے نہیں نکالا گیا۔

کیا پنجاب کے تمام وزیروں کی کارکردگی سو فیصد درست جارہی ہے؟اگر پنجاب کے وزیروں کی کارکردگی شاندار ہے تو پنجاب کی حکومتی مشنری درہم برہم کیوں ہو گئی ہے؟پنجاب میں حکومت کی کارکردگی کا اندازہ صحت اور تعلیم کے شعبوں کی موجودہ ناقص صورتحال لگایا جا سکتا ہے۔

مسلم لیگ (ن) کی رہنما عظمیٰ بخاری نے وزیراعظم کے دورہ لاہور کے ردعمل میں کہاپنجاب کے سرکاری ہسپتالوں میں مفت ادویات اور ٹیسٹوں کی سہولت ختم کردی گئی ہے۔پنجاب کا تعلیمی نظام چیخ چیخ کر حکومت کی نااہلی کا واویلہ کررہا ہے۔

مزید پڑھیں : نوازشریف آج بھی سویلین بالادستی کی جنگ لڑرہے ہیں‘ عظمیٰ بخاری

وزیر صحت پنجاب اور وزیر تعلیم اپنے من پسند افراد کو نوازنے میں مصروف عمل ہیں۔پنجاب کاہر وزیر خود کو وزیر اعلیٰ تصور کرتا ہے عثمان بزدار کابینہ اجلاسوں میں بے بس نظر آتے ہیں۔شہبازشریف دور کے تمام زیر تکمیل پروجیکٹس پر کام روک دیا گیا ہے۔

شہبازشریف کے منصوبوں پر اپنی تختیاں لگاکر بار بار ان کے افتتاح کیے جارہے ہیں۔ننکانہ یونیورسٹی میاں نوازشریف کا منصوبہ ہے اس کیلئے فنڈز بھی نوازشریف نے ہی رکھے۔

عمران خان کی ایک کروڑ نوکریاں اور پچاس لاکھ گھر کا منصوبہ چاند پر زیر تکمیل ہے۔

آئندہ چند روز میں وزیر اعظم تمام حکومتی وزراء کے ہمراہ چاند پر ان منصوبوں کا سنگ بنیاد رکھنے جارہے ہیں۔اب عوام کو ایک کروڑ نوکریاں اور پچاس لاکھ گھروں کیلئے چاند پر جانا ہوگا۔