اسلام آباد میں قبضہ مافیا کا راج، فائرنگ سے وکیل سمیت 5افراد زخمی

اسلام آباد(یاسین ہاشمی) تھانہ کورال کے علاقہ غوری ٹاون فیز سیون میں قبضہ مافیا نے پولیس کی موجودگی میں فائرنگ کرکے مقامی وکیل سمیت 5 افراد کو زخمی کر دیا۔ حملہ آور نے موقع پر موجود پولیس وین پر پتھراو کرکے نقصان بھی پہنچایا۔

واقعہ اتوار کے روز سولہ فروری کو دن بارہ بجے پیش آیا۔بعدازاں زخمیوں کو پمزہسپتال منتقل کرا دیا گیا ہے۔

واقعات کے مطابق غوری ٹاون فیز سیون میں فیصل اسماعیل ایڈووکیٹ اپنے پلاٹ پر تعمیرات کرانے میں مصروف تھاکہ اسی دوران علاقے کے قبضہ مافیا یونس خان اور سراج خان دیگر ساتھیوں کے ہمراہ وہاں آیا اور جھگڑا شروع کیا۔

مزید پڑھیں:اسلام آباد میں قبضہ مافیا کا راج: اسکول اور کالج کی جگہ پر غیر قانونی تعمیرات شروع

جس پر فیصل ایڈووکیٹ نے ون فائیو پولیس کو اطلاع کر دی۔کچھ دیر بعد پولیس وین پر چند اہلکار موقع پر پہنچ گئے۔ پولیس کی موجودگی میں ملزم یونس خان نے فائرنگ شروع کردی اور اس کے ساتھیوں نے کلاشنکوف کے بٹ مارے۔

واقعہ میں فیصل ایڈووکیٹ سمیت پانچ افراد زخمی ہوگئے۔ زخمیوں میں فیصل اسماعیل، محمد اعجاز، نعمان اعجاز، مجتبیٰ اور معین شامل ہیں۔حملہ آوروں نے پولیس وین پر پتھراو بھی کیا اور موقع سے فرار ہوگئے۔ بعدازاں زخمیوں کو پمزہسپتال منتقل کر دیا گیا ہے۔