کوئٹہ میں جناح روڈ پر دھماکہ،4افرادجاں بحق، 15 زخمی

کوئٹہ: جناح روڈ پر دھماکے میں 4افرادجاں بحق اور 15 زخمی ہوگئے، امدادی ٹیمیں پہنچ گئیں، سیکورٹی اداروں نے جائے وقوعہ کو گھیرے میں لے لیا۔

تفصیلات کے مطابق دھماکا سائنس کالج کے قریب جناح روڈ پر ہوا،پولیس ترجمان نے تصدیق کی ہے کہ دھماکہ خیز مواد ایک گاڑی کے قریب نصب کیا گیا تھا۔

ترجمان پولیس کا مزید کہنا تھا کہ دھماکے کی نوعیت جاننے کیلئے تحقیقات جاری ہیں جبکہ سیکورٹی فورسز اور ریسکیو اہلکار دھماکے کی جگہ پر پہنچ گئے ہیں۔

مزید پڑھیں:کوئٹہ میں زوردار دھماکہ، ایک شخص جان کی بازی ہار گیا

واضح رہے کہ 18 دسمبر کو کوئٹہ کے قندھاری بازار میں دھماکے کے نتیجے میں ایک شخص جاں بحق اور 10 زخمی ہوگئے تھے۔

سول اسپتال کوئٹہ کے ترجمان ڈاکٹر وسیم بیگ نے ایک شخص کے جاں بحق ہونے کی تصدیق کرتے ہوئے بتایا تھا کہ 10 افراد کو زخمی حالت میں اسپتال لایا گیا ہے۔

محکمہ انسداد دہشت گردی کے ترجمان کے مطابق دھماکا موٹر سائیکل میں نصب بارودی مواد سے ہواتھا جبکہ دھماکے میں کئی گاڑیوں کو نقصان پہنچا تھا۔