گوگل نیوز پر ہمیں فالو کریںکراچی پولیس نے کوئٹہ سے لائی گئی منشیات کی علاقے میں سپلائی ناکام بناتے ہوئے میاں بیوی سمیت 4 بین الصوبائی ڈرگ سپلائر گروہ کے کارندوں کو گرفتار کرلیا ہے۔
تفصیلات کے مطابق پولیس نے خفیہ اطلاع پر علی ابراہیم حیدری کے علاقے علی اکبر شاہ گوتھ کے قریب ریڑھی روڈ پر کارروائی کی جس کے دوران مشکوک کار کو روکا گیا اور تلاشی لی گئی۔ پولیس نے کار سواروں کے قبضے سے 1 کلو گرام ہیروئن، 2 کلو چرس اور 7 کلو افیون برآمد کر لی۔
گرفتار ملزمان میں خاتون بھی شامل ہیں جن کا فائدہ اٹھا کر ملزمان چیکنگ سے بچنے کی کوشش کرتے تھے۔ گرفتار ملزمان ابراہیم حیدری اور اطراف کے علاقوں میں منشیات کی سپلائی پہنچانے آئے تھے۔ گرفتار ملزمان کے رابطے میں رہنے والے افراد کی گرفتاری کیلئے تلاش جاری ہے۔
ابراہیم حیدری پولیس کا کہنا ہے کہ گرفتار خاتون ملیر سٹی کی رہائشی ہے۔ ملزمہ کے تمام رشتہ دار منشیات کے کاروبار میں ملوث ہیں۔ گرفتار ملزمان شہر میں منشیات کی سپلائی کے مرکزی کرداروں کے اہم ساتھی ہیں۔ ملزمان کے خلاف مقدمہ درج کر لیا گیا جن سے تفتیش جاری ہے۔
پولیس کا کہنا ہے کہ گرفتار ملزمان سے گروہ کے دیگر افراد اور منشیات کے خریداروں کے متعلق پوچھ گچھ کی جارہی ہے۔ گرفتار ملزمان میں حنا زوجہ شیرعلی، شیر علی، محمد خان اور سلمان خان شامل ہیں۔ ملزمان سے کی جانے والی تفتیش میں مزید انکشافات متوقع ہیں۔
یاد رہے کہ اِس سے قبل ضلع ایسٹ پولیس نے کامیاب کارروائی کرتے ہوئے پی آٸی بی کالونی کے سب سے بدنام منشیات فروش کو پولیس مقابلے کے دوران زخمی کردیا جو بعد ازاں جان کی بازی ہارگیا۔
تھانہ پی آٸی بی پولیس کا عیسیٰ نگری جھنڈے شاہ قبرستان پر منشیات فروش ملزمان سے مقابلہ ہوا۔ پولیس نے مقابلے کے ایک ملزم کو شدید زخمی حالت میں ساتھی سمیت گرفتار کرلیا تاہم 2 ملزمان فرار ہونے میں کامیاب ہو گئے۔ مقابلے میں زخمی ہونے والا منشیات فروش نعیم شاہ کو اسپتال منتقل کیا جارہا تھا کہ وہ زخموں کی تاب نہ لاتے ہوئے دم توڑ گیا۔
مزید پڑھیں: پولیس کی بڑی کارروائی، بدزمانہ منشیات فروش نعیم شاہ مقابلے میں ہلاک
