بین الاقوامی سطح پر کشمیر کاز کے لیے کام کیا جائے گا، بیرسٹر سلطان محمود کا عزم

مظفر آباد:  آزاد کشمیر کے نو منتخب صدر بیرسٹر سلطان محمود کا کہنا ہے کہ کشمیر کاز پر کسی صورت سمجھوتا نہیں کیا جائے گا، انہوں نے اس عزم کا اظہار کیا کہ بین الاقوامی سطح پر کشمیر کے لیے کام کریں گے۔

بیرسٹرسلطان محمود نے تحریک انصاف کی قیادت اور وزیراعظم پاکستان کا شکریہ ادا کرتے ہوئے کہا گروپ بندی کاپروپیگنڈاکرنے والے ناکام ہو گئے ، تحریک انصاف وزیر اعظم پاکستان کی قیادت میں متحد ہے۔

نو منتخب صدر بیرسٹرسلطان محمود نے اپنے بیان میں کہا ہے کہ مجھے ریاست کے سب سے بڑے عہدے کے لیے چنا گیا ہے، اس لیے کشمیر کاز پر سمجھوتا نہیں کروں گا۔ ان کا کہنا تھا کہ صدر کے عہدے کو مزید باوقار بناؤں گا ، عہدے پر ریاست کی بڑی بڑی شخصیت فائز رہی ہیں۔

ان کا کہنا تھا کہ صدرکا عہدہ ہے صرف پروٹوکول نہیں مسائل کے حل کے لیے بھی ہے، مسئلہ کشمیر کے لیے صدارتی منصب مؤثر انداز میں کردار ادا کر سکتا ہے، تاہم ماضی میں صدر کے منصب سے خاطر خواہ کام نہیں کیاجا سکا۔

نو منتخب صدر نے مزید کہا کہ بین الاقوامی سطح پر کشمیر کے لیے کام کروں گا، آزاد کشمیر کی آئینی حیثیت تبدیل کرنے کی کوئی تجویز نہیں ، مجھے تاریخ میں سب سے زیادہ ووٹ ملے ، زیادہ ووٹ ملناپی ٹی آئی اور عمران خان پر اعتماد ہے۔

یہ بھی پڑھیں : ملا عبدالغنی برادر کو افغانستان میں اہم عہدہ ملنے کا امکان، 20 برس بعد اپنے ملک پہنچیں گے