پٹرولیم میں سرمایہ کاری کیلئے کاروبار کو تحفظ فراہم کرے، ناصر حیات مگوں

کراچی: ایف پی سی سی آئی کے صدر میاں ناصر حیات مگوں نے حکومت پر زور دیا ہے کہ پٹرولیم ڈاؤن اسٹریم سیکٹر میں موجودہ اور مستقبل کی سرمایہ کاری کے لیے کا روباروں کو تحفظ فراہم کیاجائے۔

انہو ں نے مزید کہاکہ ملک میں پٹرولیم مصنوعات کی فراہمی پہلے ہی کافی دباؤ میں ہے اور مستقبل قریب میں بھی اسی طرح رہے گی جس کی وجوہات میں پٹرول کی قیمتوں میں مسلسل اضافہ، روپے کی قدر میں کمی اور بے یقینی شامل ہیں۔

ایف پی سی سی آئی کے صدر نے کہا کہ بجلی کی قیمتوں میں بے تحاشہ اضافہ ہونے کی وجہ سے پٹرولیم ڈیلرز کے لیے کاروبار کرنے کی لاگت میں خاطر خواہ اضافہ ہوا ہے جس میں کم از کم اجرت 25,000روپے،فیول کی قیمتوں میں افراط زر کی وجہ سے ڈیمانڈ میں کمی اور کم ہوتے ہو ئے پرافٹ مارجن نے اس شعبہ کو غیر منافع بخش بنا دیا ہے۔

مزید پڑھیں:

ایف پی سی سی آئی نے کوکنگ آئل سستا کرنے کا فارمولا پیش کردیا

یورپی یونین کے کو آپریشن ہیڈ کا ایف پی سی سی آئی کا دورہ

انہوں نے اپنی شدید تشویش کا اظہار کیا کہ اگر یہ شعبہ طویل مدتی طور پر بھی غیر منافع بخش ہو گیا تو اس شعبے میں مزید سرمایہ کاری رک جائے گی اور یہ ملک کی فیول سپلا ئی سیکیورٹی کے لیے ایک خوفناک صورتحال ہوگی۔

میاں ناصر حیات مگوں نے وضاحت کی کہ پٹرول اور ڈیزل پر مارجن بالتر تیب 3اعشاریہ91 روپے اور 3اعشاریہ30 روپے فی لیٹرہے اوراس کمیشن مارجن پر 12فیصد کا ودہولڈنگ ٹیکس آئل مارکیٹنگ کمپنی کی لائسنسنگ فیس 20 پیسے فی لیٹر لاگو ہوتی ہے اور دیگر کچھ متعلقہ عوامل مجموعی طور پر اس کمیشن مارجن میں سے تقریباً ایک روپیہ مزید کم کر دیتے ہیں۔

کنوینر برائے ایف پی سی سی آئی مرکزی قائمہ کمیٹی برائے پٹرولیم مصنوعات اور ڈیلرز سمیر گلزار نے حکام پر زور دیا کہ وہ فوری طور پر ایف پی سی سی آئی کے پلیٹ فارم سے اسٹیک ہولڈرز کے ساتھ مشاورتی عمل شروع کریں تاکہ آنے والے بحران کو حل کیا جا سکے جس سے ملک میں ریٹیل سطح پر پٹر ول کی سپلائی متاثر ہو سکتی ہے۔

انہوں نے مزید کہا کہ پٹرولیم ڈیلرز ملک کے ڈاؤن اسٹریم سیکٹر کی خدمت جاری رکھنا چاہتے ہیں اور ان کا مقصد صرف اپنے کاروبار کو منصفانہ اور پائیدار طریقے سے منافع بخش رکھنا ہے۔