کراچی پولیس جرائم پیشہ عناصر کیخلاف متحرک، 1479گرفتار

کراچی :پولیس کی شہر میں جرائم کی روک تھام کیلئے اسٹریٹ کرمنلز منشیات فروشوں اور مفرور ملزمان کیخلاف کامیاب کارروائیاں،سیکڑوں ملزمان کو گرفتار کرلیا۔

پولیس نے گزشتہ ہفتے کراچی کے ایسٹ، ویسٹ اور ساؤتھ زونز میں چھاپوں کے دوران مجموعی طور پر 1479 سے زائد ملزمان کو گرفتار کیا جبکہ مختلف علاقوں میں منشیات کیخلاف مہم کے دوران لاکھوں روپے مالیت کی 115 کلو 94 گرام چرس، 515 گرام ہیروئن، 03 کلو 686 گرام آئس،کرسٹل برآمد کی۔

مزید پڑھیں:کراچی سے اسلام آباد جانے والی پرواز میں جیب کتروں کی کارروائی، کینیڈین نژاد فیملی کا پرس مارلیا

گرفتار اسٹریٹ کرمنلز سے شہریوں سے لوٹ مار اور دیگر وارداتوں میں استعمال شدہ 107 سے زائد مختلف اقسام کا غیر قانونی اسلحہ بمعہ ایمونیشن اور 4دستی بم تحویل میں لئے گئے۔

شہر میں انسداد جرائم کے دوران ملزمان سے پولیس کے 6مقابلے ہوئے، فائرنگ کے تبادلے میں 2ڈاکو ہلاک جبکہ 6زخمیوں سمیت 7ڈاکوؤں کو گرفتار کیا گیا، گرفتار ڈاکوؤں سے 4مسروقہ موٹرسائیکلیں اور 7پستول بمعہ لوڈ میگزین برآمد ہوئے جنہیں فارنزک کیلئے روانہ کر دیا گیا ہے۔

اسپیشل انویسٹی گیشن یونٹ کراچی کی جانب سے سنگین جرائم میں ملوث 5ملزمان کو گرفتار کیا گیا۔اینٹی وہیکل لفٹنگ سیل نے شہر کے مختلف علاقوں میں کارروائیوں کے دوران موٹرسائیکل لفٹنگ میں ملوث 11 ملزمان کو گرفتار کر کے 12مسروقہ موٹرسائیکلیں اور 1پستول برآمد کی۔کراچی پولیس نے مختلف علاقوں میں کارروائیاں کرتے ہوئے مجموعی طور پر 74 چھینی و چوری شدہ موٹرسائیکلیں تحویل میں لے لی۔