مولانا فضل الرحمان کی زیرصدارت متحدہ اپوزیشن کی آل پارٹیز کانفرنس

اسلام آباد: جمعیت علمائے اسلام ف کے سربراہ مولانا فضل الرحمان کی زیر صدارت اپوزیشن جماعتوں کی آل پارٹیز کانفرنس جاری ہے، اجلاس میں حکومت مخالف آئندہ کی حکمت عملی کے بارے میں غورکیا جارہا ہے۔

سربراہ جے یو آئی (ف)مولانا فضل الرحمان کی زیرصدارت متحدہ اپوزیشن کی اے پی سی شروع ہو گئی، چیئرمین پیپلزپارٹی بلاول بھٹو زرداری وفد کے ہمراہ شریک ہیں،پیپلزپارٹی کے وفد میں فرحت اللہ بابر، نئیر بخاری، مصطفی کھوکھر، یوسف رضا گیلانی، شیری رحمان، راجہ پرویز اشرف شامل ہیں۔

ن لیگ کے رہنما احسن اقبال، پشتونخوا ملی عوامی پارٹی کے چیئرمین محمود خان اچکزئی، قومی وطن پارٹی کے سربراہ آفتاب خان شیرپاؤ، اے این پی کے رہنما امیر حیدر خان ہوتی، نیشنل پارٹی کے رہنما سینیٹر حاصل بزنجو اور جے یو پی کے مرکزی سیکرٹری جنرل اور متحدہ مجلس عمل کے ترجمان انس نورانی بھی اجلاس میں شریک ہیں۔

مولانا فضل الرحمان، مولانا غفور حیدری، اکرم درانی اور جے یو آئی کے دیگر رہنماؤں نے مہمانوں کا استقبال کیا۔ مولانا فضل الرحمان اپوزیشن رہنماؤں کو حکومت کے خلاف مہم میں آئندہ کی حکمت عملی پر اعتماد میں لیں گے جس میں قومی و صوبائی اسمبلیوں سے مشترکہ استعفوں پر بھی مشاورت ہوگی جبکہ اجلاس میں حکومت مخالف آئندہ کی حکمت عملی کے بارے میں غورکیا جارہا ہے۔