وزیر اعظم سے آرمی چیف کی ملاقات، سیکورٹی امور پر تبادلہ خیال

اسلام آباد: وزیراعظم عمران خان سے آرمی چیف جنرل قمر جاوید باجوہ نے بدھ کو ملاقات کی۔

ملاقات میں ڈائریکٹر جنرل (ڈی جی) آئی ایس آئی لیفٹیننٹ جنرل ندیم انجم بھی موجود تھے۔ اطلاعات کے مطابق ملاقات میں پاک فوج سے متعلق پیشہ ورانہ امور پر تبادلہ خیال کیا گیا اور وزیراعظم کے آئندہ دورہ چین کے حوالے سے مشاورت کی گئی۔

ملاقات میں سیکیورٹی اور علاقائی صورتحال پر بھی تبادلہ خیال کیا گیا۔ ملاقات میں وزیر خارجہ شاہ محمود قریشی اور وزیر اطلاعات فواد چوہدری نے بھی شرکت کی۔

یہاں یہ بات قابل ذکر ہے کہ وزیراعظم عمران خان چین کے ساتھ دوطرفہ تعلقات کو مزید مستحکم کرنے کے لیے فروری کے پہلے ہفتے میں بیجنگ کا دورہ کرنے والے ہیں۔

وزیراعظم اگلے ماہ چین کے تین روزہ دورے پر روانہ ہوں گے جہاں وہ بیجنگ میں 2022 کے سرمائی اولمپک گیمز کی افتتاحی تقریب میں شرکت کریں گے۔ وزیراعظم چینی قیادت کی دعوت پر تقریب میں شرکت کریں گے۔ وزیر خارجہ سمیت پانچ رکنی وفد بھی وزیراعظم کے ہمراہ ہوگا۔

دورے کے دوران، وزیر اعظم عمران خان چینی قیادت کے ساتھ دو طرفہ بات چیت کریں گے، خاص طور پر اقتصادی اور تجارتی تعلقات کو آگے بڑھانے پر توجہ مرکوز کریں گے، ذرائع نے بتایا کہ دونوں فریقین باہمی دلچسپی کے علاقائی اور بین الاقوامی امور پر بھی تبادلہ خیال کریں گے۔

مزید پڑھیں: بریگیڈیئر (ر) مصدق عباسی کو معاون خصوصی برائے احتساب مقرر کرنے کافیصلہ

وزیراعظم نے چین کا دورہ کرنے والے پانچ وفاقی وزراء کو بھی ہدایت کی ہے کہ وہ چین کے اہم ترین دورے کی تیاریوں کو حتمی شکل دیں۔ انہوں نے وفاقی وزراء کو دورہ سے قبل کورونا کی احتیاطی تدابیر پر عمل کرنے کا مشورہ بھی دیا ہے۔