گیس کی کمی، کراچی میں سی این جی اسٹیشن تین روز کیلئے بند

کراچی: شہر قائد میں گیس کی قلت کے باعث سی این جی اسٹیشن پھرتین روز کیلئے بند،حکام نے کراچی کے سی این جی اسٹیشنوں کو گیس کی سپلائی ایک بار پھر منقطع کر دی۔

سوئی سدرن گیس حکام کے مطابق سی این جی اسٹیشنز کو گیس کی فراہمی 72 گھنٹے یعنی جمعہ کی صبح 8 بجے سے پیر کی صبح 8 بجے تک بند رہے گی۔

سوئی سدرن گیس نے ایک بیان میں کہا ہے کہ سی این جی سیکٹر کو گیس کی فراہمی معطل کرنے کا فیصلہ کم پریشر کی وجہ سے کیا گیا ہے۔

کمپنی نے مزید کہا کہ گھریلو صارفین کو گیس کی فراہمی کو بہتر بنانے کے لیے لوڈ مینجمنٹ پلان کے تحت سی این جی سیکٹر کو سپلائی معطل کر دی گئی ہے۔

مزید پڑھیں:کراچی میں سی این جی اسٹیشن مالکان کا سوئی سدرن کے خلاف مظاہرہ

خیال رہے کہ اس سے قبل گزشتہ برس دسمبر میں بھی کراچی میں گیس کا بحران زورپکڑ گیا تھا،جس کے باعث گھروں کے چولہے ٹھنڈے پڑ گئے سی این جی اسٹیشنز بھی گیس بندش کے باعث ویران ہونے لگے۔

گیس بحرا ن پر سی این جی ایسوسی ایشن کے عہدیداران نے 24 دسمبر کو احتجاجی مظاہرہ کیا اور مطالبہ کیا کہ حکومت فوری طورپر سی این جی اسٹیشنز کوگیس کی فراہمی یقینی بنائے۔