کراچی آنیوالی عالمی معیار کی گرین لائن بسیں راولپنڈی، پشاور اور لاہورکی بسوں سے جدید

کراچی:کراچی گرین لائن منصوبے کے لیے بسیں فراہم کرنے والی کمپنی الحاج بس کے جنرل منیجر مارکیٹنگ شکور احمد خان کاکہنا ہے کہ کراچی کی بسیں لاہور، اسلام آباد اور پشاور میں چلنے والی بسوں کے مقابلے میں سب سے زیادہ جدید ہیں۔

شکور احمد خان کا کہنا ہے کہ کراچی کے لیے درآمد کردہ بسیں یورو تھری معیار کی ہیں۔ 18 میٹر لمبی بسوں میں 40 نشستیں ہیں۔ کھڑے ہوکر اور نشستوں پر بیک وقت 150 افراد سفر کرسکیں گے، زیادہ رش کی صورت میں 190 مسافروں کی گنجائش ہوگی۔بسوں میں معذور افراد کے لیے جگہ خصوصی ہے اور خودکار ریمپ نصب ہے۔ ہر بس میں دو وہیل چیئرز کی جگہ مخصوص ہے۔

مزید پڑھیں:کویتی حکام کا پاکستانی ایئر لائنز کو آپریشن کی اجازت دینے سے انکار

بسیں بنانے والی کمپنی زونگ ٹونگ کا شمار چین کی 5 سرفہرست کمپنیوں میں ہوتا ہے۔ یہ بسیں یورپی ملکوں اور مشرق وسطیٰ کو بھی ایکسپورٹ کی جارہی ہیں، اس ڈیزائن کی بسیں سعودی عرب نے بھی گزشتہ سال بڑی تعداد میں حج آپریشن کے لیے درآمد کی تھیں۔

گرین لائن بس سروس کی آپریٹر کمپنی ڈائیو کے آپریشن ہیڈ شاہ زمان نے میڈیا سے گفتگو کے دوران کہا کہ 200 ڈرائیورز کو تربیت دی جائے گی، اس کے لئے خواتین ڈرائیورز بھی رجوع کرسکتی ہیں، بس اسٹیشن پر کیش ٹکٹ کی سہولت ہوگی۔

ماہانہ کارڈ سے بھی ٹکٹ کی ادائیگی کی جاسکے گی، کسی فنی خرابی کی صورت میں انجن بند ہونے پر بھی خودکار سسٹم 40 کلو میٹر تک بس کو چلاسکے گا، اس کے علاوہ ٹریک پر ہنگامی ایگزٹ اور ٹو ٹرک بھی موجود رہیں گے