اے سی سی اے میں پہلی پوزیشن حاصل کرکے وطن کا نام روشن کرنے والی زارا نعیم

گزشتہ روز پاکستانی طالبہ زارا نعیم نے اے سی سی اے میں پہلی پوزیشن حاصل کرکے دنیا بھر کو حیران کردیا۔ وطن کا نام روشن کرنے والی زارا نعیم نے اکاؤنٹنگ کے امتحان میں ٹاپ کرکے پاکستانی سوشل میڈیا صارفین سے لے کر وفاقی وزراء تک ہر شخص سے داد وصول کی۔

آئیے زارا نعیم کی اِس تاریخی کامیابی کے حوالے سے وفاقی وزراء کے بیانات اور زارا نعیم کے حوالے سے سوشل میڈیا سمیت ذرائع ابلاغ کے دیگر پلیٹ فارمز پر گردش کرنے والی دیگر خبروں کا جائزہ لیتے ہیں۔

پاکستانی طالبہ زارا نعیم کی کامیابی اور وفاقی وزراء کے بیانات

ہم سوشل میڈیا سمیت ذرائع ابلاغ کے دیگر پلیٹ فارمز پر زیادہ تر سیاست، جرائم اور حادثات کی خبروں کی بازگشت سنتے ہیں تاہم تعلیمی میدان میں شاذو نادر ہی کسی کی کامیابی کو اتنا سراہا جاتا ہے جیسا کہ زارا نعیم کو گزشتہ روز سے اب تک سراہا جارہا ہے۔

وفاقی وزیرِ اطلاعات شبلی فراز نے گزشتہ روز سماجی رابطے کی ویب سائٹ ٹوئٹر پر اپنے پیغام میں کہا کہ زرا نعیم نے اے سی سی اے امتحانات میں ٹاپ کرکے اپنے آپ کو ملک کا فخر ثابت کیا۔ میں انہیں اِس کامیابی پر مبارکباد دیتا ہوں۔ 

Zara Naeem Dar has become pride of the nation by topping the ACCA exams across the world.Congratulations.

— Senator Shibli Faraz (@shiblifaraz) February 15, 2021

وزیرِ انسانی حقوق ڈاکٹر شیریں مزاری بھی زارا نعیم کو اے سی سی اے میں ٹاپ کرنے پر خراجِ تحسین پیش کرتے ہوئے کہا کہ میں پاکستان کی ایک اور ایسی لڑکی زارا نعیم کو مبارکباد پیش کرتی ہوں جس نے ہمارا سر فخر سے بلند کردیا۔ 

Congratulations! Another Pakistani girl does us proud. #ZaraNaeem #SarBulandhttps://t.co/wDPLXqgeXP

— Shireen Mazari (@ShireenMazari1) February 16, 2021

سینیٹر فیصل جاوید خان نے بھی زارا نعیم کو اے سی سی اے امتحان میں اعلیٰ ترین نمبر حاصل کرنے پر مبارکباد دیتے ہوئے کہا کہ زارا نعیم نے بہت زبردست کامیابی حاصل کی ہے۔ ہم انہیں عالمی انعام جیتنے پر مبارکباد پیش کرتے ہیں۔

Congratulations Zara Naeem for scoring highest marks among all ACCA students in the Financial Reporting exam and getting declared as global prize winner. Welldone!!! Masha'ALLAH @ACCA_PK @GdNewsPakistan pic.twitter.com/KSfot3WEY1

— Faisal Javed Khan (@FaisalJavedKhan) February 15, 2021

حکومتِ پاکستان کے ٹوئٹر ہینڈل سے بھی زارا نعیم کو مبارکباد پیش کی گئی۔ کہا گیا کہ زارا نعیم نے اے سی سی اے میں سب سے زیادہ نمبر حاصل کیے جو پاکستان کیلئے ایک فخر کا لمحہ ہے۔ 

سوشل میڈیا صارفین کا ردِ عمل 

سماجی رابطے کی ویب سائٹ ٹوئٹر پر اے سی سی اے آج کا ٹاپ ٹرینڈ رہا جس کے تحت ہزاروں پیغامات ارسال کیے گئے اور پاکستان کے عوام نے زارا نعیم کو ان کی کامیابی پر مبارکباد پیش کی۔

لائبہ نامی سوشل میڈیا صارف نے کہا کہ پاکستانی طالبہ زارا نعیم نے اے سی سی اے امتحانات میں ریکارڈ توڑ نمبر حاصل کیے اور ملک کا نام روشن کردیا۔ 

https://twitter.com/itslaaiba/status/1361274716611358721

طوبیٰ نے اپنے ٹوئٹر پیغام میں اے سی سی اے میں ٹاپ کرنے والی پاکستانی طالبہ زارا نعیم کو حقیقی سپر اسٹار قرار دیا۔ 

She is a real Super Star ????❤
ACCA topper ???? pic.twitter.com/SKyAIBy2Ir

— T O O B A ???? (@LazyEngr9) February 15, 2021

ندا مرزا نے زارا نعیم کو اے سی سی اے میں ٹاپ کرنے پر قابلِ تعریف قرار دیتے ہوئے عوام کو نصیحت کی کہ پارٹی ہو رہی پر میمز بنانے کی بجائے زارا نعیم کی تعریف پر توجہ دیں اور قوم کی اس بیٹی کو پروموٹ کریں جس نے ہمارے سر فخر سے بلند کردئیے۔ ندا مرزا نے زارا نعیم کیلئے نیک خواہشات کا اظہار کرتے ہوئے انہیں دعاؤں سے بھی نوازا۔ 

https://twitter.com/NidaMirza17/status/1361403046421557253

اے سی سی اے میں کامیابی کی اہمیت 

سن 2020ء ایک مشکل تعلیمی سال رہا جس کے دوران متعدد بچوں کو تعلیمی مسائل کا سامنا کرنا پڑا کیونکہ لاک ڈاؤن اور کورونا وائرس ایس او پیز کے باعث تعلیمی عمل تعطل اور بعض منفی رجحانات کا شکار رہا۔

دسمبر 2020ء میں ایسوسی ایشن آف چارٹرڈ سرٹیفائیڈ اکاؤنٹنٹس (اے سی سی اے) کا فنانشل رپورٹنگ کا امتحان ہوا جس میں پاکستانی طالبہ زارا نعیم نے ٹاپ کرکے 179 ممالک کے لاکھوں طلباء کو پیچھے چھوڑ دیا۔

لاہور سے تعلق رکھنے والی زارا نعیم نے اے سی سی اے کے 7ویں امتحان میں سب سے زیادہ نمبر حاصل کرکے دنیا کو حیران کردیا۔ امتحان کی تیاری میں زارا نعیم کو 2 سال لگ گئے۔

اب تک زارا نعیم نے اے سی سی اے کے تمام لازمی مضامین تو پاس کر لیے مگر اے سی سی اے کلیئر کرنے کیلئے کچھ دیگر امتحانات تاحال باقی ہیں لیکن اے سی سی اے میں تعلیم کی تکمیل نہ ہونے کے باوجود زارا نعیم متعدد کمپنیوں کیلئے ترقی کا بے مثال زینہ ثابت ہوسکتی ہیں۔

بہ الفاظِ دیگر یہ کہا جاسکتا ہے کہ زارا نعیم کا اے سی سی اے تاحال مکمل نہیں ہوسکا، اس کے باوجود کئی کمپنیاں ایسی ہیں جنہوں نے زارا نعیم کو نوکری کی پیشکش کی ہے اور منہ مانگی تنخواہ دینے کی باتیں بھی جاری ہیں۔یہ ہے اِس کامیابی کی اہمیت۔ 

زارا نعیم کا ردِ عمل 

ملک کیلئے تاریخی کامیابی کے حصول کے بعد عالمی میڈیا سے گفتگو کرتے ہوئے زارا نعیم نے کہا کہ میں بچپن سے ہی پڑھائی کا شوق رکھنے والی طالبہ ہوں جس نے اسکالر شپ پر او لیول اور اے لیول کیے۔

گفتگو کے دوران زارا نعیم نے کہا کہ امتحانات قریب آنے پر میری تعلیمی تیاریوں میں بھی اسی رفتار سے تیزی آجاتی ہے۔ میں 2 ماہ پہلے سے ہی روز 3 سے 4 گھنٹے پڑھائی کو معمول بنا لیتی ہوں۔

انہوں نے کہا کہ ہوسکتا ہے کہ کچھ لوگوں کو اکاؤنٹنگ کا مضمون لگے لیکن میں اکاؤنٹنگ میں شروع سے دلچسپی رکھتی ہوں۔ لوگ مجھے ڈاکٹر بننے کا کہتے تھے لیکن اکاؤنٹنگ میرا شوق تھا جس کیلئے میرے والدین میرے ساتھ ہیں۔واضح رہے کہ زارا نعیم ایک فوجی خاندان سے تعلق رکھتی ہیں جن کے والد بریگیڈئیر رہ چکے ہیں۔

اکاؤنٹنگ پڑھنے پر والدین کے ردِ عمل کا ذکر کرتے ہوئے زارا نعیم نے کہا کہ میرے والد میرے فیصلے میں میرے ساتھ تھے، انہوں نے کہا کہ آپ وہی کریں جو آپ کا دل چاہے۔ میری والدہ نے بھی ایک ہاؤس وائف ہونے کے باوجود میرا ساتھ دیا، نیک تمناؤں اور دعاؤں سے نوازا۔

تفریحی مواد کی حمایت کرتے ہوئے زارا نعیم نے کہا کہ اکاؤنٹنگ کو ایک خشک مضمون سمجھا جاتا ہے اور میں سمجھتی ہوں کہ وقت کو تفریح میں گزارنے میں کوئی غلط بات نہیں۔لوگ ہنسنا کھیلنا پسند کرتے ہیں جو آج کل ایک ضرورت بن چکا ہے۔

ان کا کہنا ہے کہ پاکستان میں پڑھائی سے متعلق چیزوں کو نمایاں کرنے کی جتنی ضرورت ہے، ہم اس دوڑ میں دوسروں سے پیچھے رہ گئے ہیں۔ تعلیمی قابلیت پر پاکستان میں اتنی زیادہ تعریف نہیں کی جاتی جس سے طلباء کی حوصلہ افزائی ہوسکتی ہے۔