جامعہ کراچی میں ورکشاپ، مردم شماری سے وسائل کی بہتر تقسیم ممکن ہے۔صلاح الدین غازی

کراچی یونیورسٹی میں ورکشاپ ہوئی جس سے  ریسرچ اسکالر صلاح الدین غازی اور ابلاغِ عامہ کے استاد ڈاکٹر عمیر انصاری نے خطاب کیا ہے۔ صلاح الدین غازی نے کہا کہ درست مردم شماری سے وسائل کی بہتر تقسیم اور قومی مسائل کا حل ممکن ہے۔

تفصیلات کے مطابق ریسرچ ایسوسی ایٹ صلاح الدین غازی نے جامعہ کراچی میں شعبۂ ابلاغِ عامہ اور پاکستان ڈویلپمنٹ فورم کے تعاون سے نقشوں کی روشنی میں پاکستان کے محلِ وقوع کی اہمیت کے عنوان سے ورکشاپ کے دوران سرور نسیم سماعت گاہ میں خطاب کرتے ہوئے کہا کہ درست مردم شماری سے ملکی وسائل کی بہتر تقسیم اور مسائل حل ہوسکتے ہیں۔

یہ بھی پڑھیں:

وزارتِ تعلیم کا ایچ ای سی کیلئے محکمۂ خزانہ سے 104 ارب کے بجٹ کا مطالبہ

معروف ریسرچ ایسوسی ایٹ صلاح الدین غازی نے کہا کہ وسائل کی غیر منصفانہ  تقسیم کے نتیجے میں معاشرہ انتشار کا شکار ہوجاتا ہے۔ کسی بھی ملک کا جغرافیہ خطے میں اس کی اہمیت کو بڑھانے میں مؤثر ثابت ہوتا ہے جبکہ خطے میں پاکستان کا جغرافیہ انتہائی اہمیت کا حامل ہے۔ وسائل اور بندرگاہوں کی موجودگی کے سبب کئی ممالک کی تجارت پاکستان سے وابستہ ہے۔

پاکستان کی اسٹرٹیجک لوکیشن کے حوالے سے صلاح الدین غازی نے کہا کہ ملک کے محل و قوع کی اہمیت کو مد نظر رکھتے ہوئے تجارتی پالیسیاں ترتیب دی جائیں تو یہ مستقبل کے لیے سازگار ثابت ہوں گی۔ شعبۂ ابلاغ عامہ کے استاد ڈاکٹر عمیر انصاری نے کہا کہ پاکستان کے محل و قوع کی اہمیت کو سمجھنا طلبہ کے لیے انتہائی ضروری ہے۔

ڈاکٹر عمیر انصاری نے کہا کہ بدقسمتی سے محلِ وقوع کی اہمیت جیسی چیزیں نصاب سے نظر انداز کی جارہی ہیں۔طلبہ قوم کا مستقبل ہیں  جن کا سیاست، جغرافیہ ،سماجیات اور معاشیات جیسے بنیادی علوم حاصل کرنا ضروری ہے تاکہ قوم کا مستقبل محفوظ ہوسکے جبکہ ایسے پروگرام اس تصور کو فروغ دیتے ہیں۔

انہوں نے کہا کہ ہماری خوش قسمتی ہے کہ چیئرپرسن شعبہ ابلاغ عامہ ڈاکٹر فوزیہ ناز ایسے پروگرامز کے انعقاد پر ہمیشہ حوصلہ افزائی کرتی ہیں۔ ورکشاپ میں طلبہ و طالبات نے بڑی تعداد میں شرکت کی جبکہ اس موقع پر طلبہ نے مقررین سے موضوع کی مناسبت سے سوالات کی نشست میں بھی حصہ لیا۔ اساتذہ، ریسرچ اسکالرز اور مقررین نے طلبہ کے سوالات کے جوابات دئیے۔