گوگل نیوز پر ہمیں فالو کریںنارووال کے تحصیل شکرگڑھ میں ایک شہری کے گھر گیس سلنڈر کے دھماکے کے نتیجے میں خواتین اور بچوں سمیت پانچ افراد زخمی ہو گئے۔
قومی ذرائع ابلاغ کے مطابق زخمیوں میں دو خواتین، دو مرد اور ایک بچہ شامل ہیں۔ حکام کے مطابق دو افراد کی حالت تشویشناک ہے جنہیں فوری طور پر اسپتال منتقل کر دیا گیا ہے۔
دھماکہ اس قدر شدید تھا کہ ایک کمرے کی دیوار منہدم ہو گئی جبکہ لاکھوں روپے مالیت کا گھریلو سامان بھی تباہ ہو گیا۔ متاثرہ خاندان کے مطابق رات گئے گیس لیک ہونے کے باعث کمرے میں گیس بھر گئی تھی جس سے یہ افسوسناک واقعہ پیش آیا۔
یہ بات قابل ذکر ہے کہ ملک بھر میں گیس سلنڈر دھماکوں اور دیگر حادثات میں مسلسل اضافہ دیکھنے میں آ رہا ہے جن کی بنیادی وجوہات میں غفلت، لاپرواہی اور احتیاطی تدابیر کا فقدان شامل ہے۔
حکام کا کہنا ہے کہ زیادہ تر حادثات انسانی غلطی کی وجہ سے پیش آتے ہیں اور اگر شہری مناسب احتیاط برتیں تو ان واقعات کی روک تھام ممکن ہے۔ اس سلسلے میں عوامی آگاہی مہم کی اشد ضرورت ہے تاکہ جان و مال کے نقصان سے بچا جا سکے۔
