گوگل نیوز پر ہمیں فالو کریںفیصل آباد کے علاقے ساندل بار میں ایک دل دہلا دینے والا واقعہ پیش آیا جہاں مسلح افراد نے ایک شخص کے سامنے اس کی بیوی کو اجتماعی زیادتی کا نشانہ بنا ڈالا۔
متاثرہ جوڑا رات کے وقت سفر کر رہا تھا جب ملزمان نے ان کا راستہ روکا، مرد کو تشدد کا نشانہ بنایا اور خاتون کو قریبی کھیتوں میں لے جا کر ظلم کا نشانہ بنایا۔
یہ واقعہ اس وقت پیش آیا جب میاں بیوی کسی ضروری کام سے گزر رہے تھے کہ اچانک چند نامعلوم افراد نے انہیں روک لیا۔
حملہ آوروں نے پہلے شوہر کو قابو میں کیا اور پھر خاتون کو زبردستی گھسیٹ کر لے گئے۔ مقامی پولیس کے مطابق، متاثرین کی شکایت پر مقدمہ درج کر لیا گیا ہے اور مجرموں کی تلاش جاری ہے۔
یہ واقعہ پاکستان میں خواتین کے خلاف بڑھتے ہوئے جرائم کی ایک اور بھیانک مثال ہے۔ اس سے قبل 9 ستمبر 2020 کو لاہورسیالکوٹ موٹر وے پر بھی ایسا ہی واقعہ پیش آیا تھا، جہاں دو ڈاکوؤں نے بچوں کے سامنے ان کی ماں کو اجتماعی زیادتی کا نشانہ بنایا تھا۔
اس دلخراش واقعے نے پورے ملک کو ہلا کر رکھ دیا تھا اور خواتین کے تحفظ کے حوالے سے شدید بحث چھیڑ دی تھی۔
فیصل آباد کے حالیہ سانحہ پر شہریوں میں شدید غم و غصہ پایا جاتا ہے اور عوامی حلقے حکومت سے مطالبہ کر رہے ہیں کہ خواتین کے تحفظ کے لیے سخت اقدامات کیے جائیں اور مجرموں کو جلد از جلد کیفر کردار تک پہنچایا جائے۔
