باپ عید کے کپڑے نہ دلاسکا، ماں نے بچوں کے ساتھ نیٹی جیٹی پل سے سمندر میں چھلانگ لگادی

کراچی: غربت اور مہنگائی سے پریشان والدین کیلئے عید پر بچوں کیلئے نئے کپڑوں کا حصول ناممکن ہوگیا، عید کے کپڑے نہ ملنے پر ماں نے بچوں  سمیت نیٹی جیٹی پل سے سمندر میں چھلانگ لگادی۔

ریسکیو ٹیموں نے ماں اور تینوں بچوں کو سمندر سے نکال کر اسپتال منتقل کردیا، جہاں ان کی حالت خطرے سے باہر ہے۔

پولیس کے مطابق منظور کالونی کی رہائشی عائشہ نامی خاتون کا اپنے شوہر سے اکثر و بیشتر جھگڑا رہتا تھا۔ شوہر نے بچوں کو عیدالفطر پر کپڑے دلانے سے بھی منع کردیا تھا، جس پر بچے اداس تھے۔ عائشہ بچوں کے چہرے پر اداسی دیکھ کر دلبرداشتہ ہوگئی۔

مزید پڑھیں:اے ایس او نے غیر ملکی شراب کراچی اسمگل کرنے کی کوشش ناکام بنادی

عائشہ نے تین بچوں سمیت نیٹی جیٹی پل سے سمندر میں چھلانگ لگادی جس پروہاں موجود شہریوں نے فوری طور پر ریسکیو ٹیموں کو اطلاع دی۔

ریسکیو ٹیم اور شہریوں نے ماں اور تینوں بچوں کو سمندر سے نکال کر ہسپتال  پہنچایا۔ ڈاکٹروں کا کہنا ہے کہ ماں اور بچوں کی حالت خطرے سے باہر ہے۔ عائشہ کے گھروالے اسپتال پہنچ گئے جہاں پولیس نے ماں اور بچوں کو ان کے حوالے کردیا۔