گوگل نیوز پر ہمیں فالو کریںافغان لیڈی ڈاکٹر ذکریہ حکمت کو وائٹ ہاؤس میں ایک تقریب کے دوران سپیشل ’جرات ایوارڈ‘ سے نوازا جائے گا۔
بدھ کو ہونے والی اس تقریب میں امریکی وزیر خارجہ انٹونی بلنکن اور امریکی خاتون اول جِل بائیڈن 17 ویں سالانہ ’انٹرنیشنل ویمن آف کریج ایوارڈز‘ کی میزبانی کریں گے۔
ڈاکٹر ذکریہ حکمت کی عمر 35 برس ہے اور وہ دنیا بھر سے ان 11 خواتین میں شامل ہیں جنہیں ایوارڈ دیا جائے گا۔ یہ ایوارڈ 2007 سے دیا جا رہا ہے۔
یہ ایوارڈ ایسی خواتین کو دیا جاتا ہے جو امن، انصاف انسانی حقوق، خواتین اور لڑکیوں کے حقوق اور جنسی برابری کے لیے غیر معمولی جرات، حوصلے اور لیڈرشپ کا مظاہرہ کرتی ہیں۔ اس کے لیے انہیں بعض اوقات خطرناک حالات کا سامنا کرنا پڑتا ہے اور قربانی دینی پڑتی ہے۔
2007 سے اب تک 80 ممالک کی 180 خواتین کو یہ ایوارڈ دیا جا چکا ہے۔ دنیا بھر کے ممالک میں موجود امریکی سفارت خانے ہر ملک سے ایک خاتون کو نامزد کرتے ہیں۔ اس کے بعد امریکی سٹیٹ ڈیپارٹمنٹ امیدوار کا انتخاب کر کے منظوری دیتا ہے۔
ڈاکٹر ذکریہ حکمت طالبان کے گزشتہ دورِ حکومت میں ملک سے فرار ہو کر ترکیہ پہنچی تھیں جہاں انہوں نے اسکالرشپ میڈیسن کی ڈگری حاصل کی اور ڈاکٹر بن گئیں۔
انہوں نے وہاں 2014 میں ’افغان رفیوجیز سولیڈیرٹی ایسوسی ایشن‘ کی بنیاد رکھی جہاں بہت سے افغان پناہ گزینوں نے پناہ حاصل کی۔
اس وقت سے ڈاکٹر ذکریہ حکمت ترکیہ میں افغان پناہ گزینوں خصوصاً خواتین، لڑکیوں اور اقلیتوں کی ترکیہ میں تحفظ اور پناہ لینے کے لیے مدد کر رہی ہیں۔
