اپنے ارکان کی حفاظت ہمارا فرض ہے، یوسف رضا گیلانی

اسلام آباد :پاکستان پیپلز پارٹی کے رہنما اور سینیٹر یوسف رضا گیلانی نے کہا ہے کہ پارلیمنٹ لاجز میں ہمارے اراکین قومی اسمبلی پر حملہ کیا گیا۔

میڈیا سے گفتگو کرتے ہوئے سینیٹر کا کہنا تھا کہ ارکان اسمبلی کو سندھ ہاؤس میں ان کی درخواست پر رکھا گیا جو کہ غیر قانونی نہیں۔

علی زیدی کے بیان پر ردعمل دیتے ہوئے یوسف رضا گیلانی نے کہا کہ سندھ ہاؤس سندھ حکومت کی ملکیت ہے اور اپنے ارکان کو پولیس تحفظ فراہم کرنا ہمارا حق ہے۔

پی پی پی رہنما نے یہ بھی کہا کہ احاطے میں صرف پی پی پی کے ارکان تھے۔

مزید پڑھیں:وزیر اعظم عمران خان کا سوات کے بعد کرم میں بھی جلسے کا فیصلہ

یاد رہے کہ اس سے پہلے وفاقی وزیرِ بحری امور سیّد علی حیدر زیدی نے سوال اٹھایا تھا کہ اسلام آباد میں سندھ کے 400 ایس ایس یو گارڈز کی فوج کا کیا کام ہے؟ ڈی آئی جی مقصود میمن ایس ایس یو کو زرداری مافیا کی نجی فوج کےطور پر چلا رہے ہیں۔

سماجی رابطے کی ویب سائٹ ٹوئٹر پر اپنے پیغام میں وفاقی وزیرِ بحری امور علی زیدی نے کہا کہ سندھ حکومت نے کس بنیاد پر ایس ایس یو کے 400مسلح گارڈز کی فوج وفاقی دارالحکومت میں تیار کی؟ اس پر خط لکھوں گا۔

وفاقی وزیر علی زیدی نے کہا کہ میں آج سیکریٹری اسٹیبلشمنٹ کو آفیشلی خط لکھ کر ایس ایس یو کے ڈی آئی جی مقصود میمن کے خلاف تحقیقات کا مطالبہ کروں گا جس نے سندھ حکومت کو اِس احمقانہ اقدام کی اجازت دی۔