پانی کی عدم فراہمی سے صنعتی پیداواری سرگرمیاں رکاوٹ کا شکار ہیں، فیصل معیز خان

کراچی: نارتھ کراچی ایسوسی ایشن آف ٹریڈ اینڈ انڈسٹری کے صدر فیصل معیز خان نے نارتھ کراچی کی صنعتوں کو پیداواری ضرورت کے مطابق پانی کی عدم فراہمی پر گہری تشویش کا اظہار کرتے ہوئے پیداواری سرگرمیاں بلارکاوٹ جاری رکھنے کے لیے بلاتعطل اور طلب کے مطابق صنعتوں کو پانی کی فراہمی کا مطالبہ کیا ہے ۔

فیصل معیز خان کا کہنا ہے کہ صنعتوں کا سہولیات فراہم کی جائیں تاکہ وزیراعظم عمران خان کے صنعتوں کے فروغ اور ملکی معیشت کے استحکام کے ویژن کو پورا کیا جاسکے۔

فیصل معیز خان نے واٹر ایم ڈی سے مطالبہ کرتے ہوئے کہاکہ پانی کی عدم فراہمی کے باعث اگر صنعتیں بند ہوئیں تو اس کی تمام تر ذمہ داری ایم ڈی واٹر بورڈ پر عائد ہوگی کیونکہ نکاٹی کی جانب سے بارہا پانی کی قلت کی نشاندہی کے باوجود صنعتوں کو ضرورت کے مطابق پانی فراہم نہیں کیا جارہا ۔

انہوں نے کہا کہ وزیراعظم ہاؤس میں وزیراعظم عمران خان کی زیرصدارت کراچی کے صنعتکاروں کے ساتھ ہونے والے اجلاس میں پانی کا مسئلہ بھی اٹھایا گیا اور وزیراعظم نے اجلاس میں یہ یقین دہانی کروائی تھی کہ پیداواری سرگرمیاں بلا کسی رکاوٹ جاری رکھنے میں حکومت صنعتکاروں کی ہر ممکن مدد کرے گی۔

وزیراعظم کا یہ بھی ماننا تھا کہ صنعتیں چلیں گی تو ملک ترقی کی شاہراہ پر گامزن ہوگا اس کے باوجود واٹربورڈ کا جان بوجھ کر صنعتوں کو پانی کی فراہمی میں رکاوٹ پیدا کرنا صنعتکاروں میں شدید تحفظات پیدا کرنے کے باعث ہے۔

مزید پڑھیں: ایران سے ٹماٹر اور پیاز درآمد کی اجازت دینا خوش آئند ہے،میاں زاہد حسین

نکاٹی کے صدر نے مطالبہ کیا کہ واٹربورڈ کونارتھ کراچی کی صنعتوں کو پیداواری ضرورت کے مطابق پانی کی بلاتعطل فراہمی کی ہدایت کی جائے تاکہ صنعتکار برداری پیداواری سرگرمیوں کو فروغ دے کر وزیراعظم عمران خان کے پاکستان کی معیشت کو مستحکم بنانے کے ویژن کی تکمیل میں اپنا کردار ادا کرسکے۔