کراچی:نجی چینل کے مرکزی دفتر پر مسلح افراد کا حملہ،توڑپھوڑ

کراچی میں بڑی تعداد میں مشتعل مسلح افراد نے جیو اور جنگ گروپ کے مرکزی دفتر  پر حملہ کردیا۔

شہر قائد کی مصروف آئی آئی چندریگر روڈ پر واقع مرکزی دفتر پر حملے کے دوران مظاہرین  نے عملے پر تشدد کیا اور دھکے بھی دیے۔

مظاہرین نے واک تھرو گیٹ اورمرکزی دروازہ توڑدیا جبکہ مظاہرین نے دفتر کے شیشے بھی توڑ دیے ہیں۔

مظاہرین نے جیو نیوز کے عملے کو حراساں کیا جبکہ عمارت کے اندر بھی خواتین سمیت ملازمین کی بڑی تعداد موجود ہے۔

مظاہرین کے توڑپھوڑ کے دوران موقع پرموجود پولیس خاموشی تماشائی بنی رہی۔

مظاہرین نے دفتر کے باہر دھرنا دے دیا ہے اور جیو نیوز کے پروگرام  کے اینکر کی وضاحت کے باوجود معافی کا مطالبہ کیا ہے۔

دوسری جانب سینیر تجزیہ کار اور جیو نیوز کے پروگرام ’خبرناک‘ کے میزبان ارشاد بھٹی نے وضاحت  دی ہے۔

ان کا کہنا ہے کہ ان کا پروگرام طنز و مزاح کا پروگرام ہے، سندھ اور سندھی اسی طرح ان کے وجود کا حصہ ہیں، جس طرح ملک کا کوئی اور دوسرا صوبہ ہے۔

یہ بھی پڑھیں: کراچی پولیس کا جرائم پیشہ عناصر کے خلاف کریک ڈاؤن،6ملزمان گرفتار،2کلوچرس برآمد

دوسری جانب وزیراعلیٰ سندھ مراد علی شاہ نے  جیو اور جنگ کے مرکزی دفتر پر حملے کی مذمت کرتے ہوئے کہا ہے کہ اس معاملے کی خود انکوائری کرائیں تو انکوائری کی نگرانی بھی کریں گے۔

وزیراعلیٰ سندھ سید مراد علی شاہ نے ہدایت کی کہ سندھ پولیس جنگ اور جیو دفتر پر حملے کی مکمل تحقیقات کر کے ذمے داروں کا تعین کرے۔