ملک کے بیشتر علاقوں میں آج بھی موسم گرم رہے گا

اسلام آباد: محکمہ موسمیات نے آئندہ چوبیس گھنٹوں کے دوران ملک کے بیشترعلاقوں میں موسم شدید گرم رہنے کا امکان ظاہر کیا ہے۔

محکمہ موسمیات کے مطابق گلگت بلتستان، بالائی خیبرپختونخواہ، بالائی پنجاب اور کشمیر میں چند مقامات پر گرج چمک کے ساتھ تیز ہوائوں کے چلنے کا امکان ہے۔ محکمہ موسمیات نے مزید کہا کہ ملک کے وسطی اور جنوبی اضلاع میں گرد آلود ہوائیں چلنے کا امکان ہے۔

آج صبح ملک کے بڑے شہروں میں مختلف درجہ حرارت ریکارڈ کیے گئے جن میں اسلام آباد اور لاہور کا درجہ حرارت 30 سینٹی گریڈ، کراچی کا 29 ڈگری سینٹی گریڈ، پشاور کا 27 ڈگری سینٹی گریڈ، کوئٹہ اور گلگت بلدستان کا 17 ڈگری سینٹی گریڈ جبکہ مری کا 18 اور مظفر آباد کا 22 ڈگری سینٹی گریڈ ریکارڈ کیا گیا۔

دوسری جانب سندھ پراونشل ڈیزاسٹر منیجمنٹ اتھارٹی نے شہریوں کو گرمی کی لہر سے نمٹنے کیلئے احتیاط برتنے کی ہدایت کی ہے اور مشورہ دیا ہے کہ ایسے اوقات میں گھروں سے نہ نکلیں جس وقت گرمی زیادہ ہوتی ہے بعدازاں پانی کے زیادہ استعمال کی بھی ہدایت کی ہے۔

یہ بھی پڑھیں: پاکستان شدید گرمی کی لپیٹ میں، ہیٹ ویو ہمارے جسم کو کس طرح سے متاثر کرتی ہے؟

خیال رہے کہ شہر قائد میں شدید گرمی کے باعث متعدد افراد بیمار ہوگئے ہیں، اسی حوالے سے انچارج عباسی شہید ڈاکٹر نادر علی سید کا کہنا ہے کہ ہفتہ کے روز ہیٹ اسٹروک سے متاثرہ 11 مریض اسپتال میں لائے گئے جن میں سے 7 مریضوں کو ابتدائی طبی امداد کے بعد گھر بھیج دیا گیا جبکہ 4 مریض داخل کیے گئے۔

ذرائع کا کہنا ہے کہ شہر میں کل سے اب تک ہیٹ ویو کے باعث 3 افراد کی جان  چلی گئی ہے جن میں سے دو اموات نجی اسپتال میں جبکہ ایک سول اسپتال میں ہوئی ہے تاہم سرکاری سطح پر تصدیق نہیں ہوسکی۔

ذرائع کے مطابق اتوار کے روز شہر میں گرمی کے باعث ملیر کے رہائشی عمر خان میچ کے دوران طبیعت خراب ہونے کے باعث اسپتال پہنچایا گیا جہاں وہ انتقال کر گئے۔