عثمان مختار اشنا شاہ کے ساتھ نئی فلم میں مرکزی کردار ادا کریں گے

کراچی :ہم کہا ں کے سچے تھے میں کامیابیوں کے جھنڈے گاڑ نے والے انتہائی باصلاحیت فنکار عثمان مختار ، جلد ہی جرائم اور سنسنی کے موضوع پر بننے والی فلم میں مرکزی کردار ادا کریں گے جس میں وہ اشنا شاہ کے مقابل ایک پولیس افسر کا کردار ادا کررہے ہیں۔

دریچے فلمز کے بینر تلے بننے والی اس فیچر فلم کی ہدایات نامور ٹی وی ڈائریکٹر ظہیرالدین دے رہے ہیں ۔ اس فلم کی شوٹنگ اسی مہینے میں لاہور میں شروع کرنے کی تیاریاں جاری ہیں۔

فنکارعثمان مختار نے اس بارے میں کہا،”مجھے اس پروجیکٹ کا حصہ بننے پر بہت خوشی ہے اور ہم کئی مہینوں سے ظہیر بھائی کے ساتھ اس پر بات چیت کررہے تھے۔ مجھے یقین ہے کہ ہم جو پیش کرنے جارہے ہیں، ناظرین اس سے بہت لطف اندوزہوں گے۔

مزید پڑھیں:اقراء عزیز کی تعریف کا جواب دینا میرا فرض تھا، پنکج ترپاٹھی

عثمان مختار کی یہ چوتھی فلم ہے، اس سے پہلے وہ جاناں، پرچی کے علاوہ صنم سعید کے مقابل ایک فلم ،عمروعیار، میں کام کرچکے ہیں جو ابھی ریلیز نہیں ہوئی ہے۔

ورسٹائل فنکار اور فلمسا ز عثمان مختارے نے اپنے کیرئیر کا آغاز2006میں فلم ،جاناں ، سے کیا۔ اس کے بعد، انا، ،اور ثبات، جیسے کامیاب سیریلز، فلم پرچی اور اپنی ایوارڈ یافتہ مختصر فلم بنچ میں اپنی اداکاری کے جوہر دکھائے۔

ان کو بے مثال اداکاری پر دو مرتبہ ہم ایوارڈ میں نامزد کیا جا چکاہے۔حال ہی میں ان کی بلاک بسٹر سیریل ہم کہاں کے سچے تھے اور صنف آہن کو بھی ناظرین کے جانب سے بہت پذیرائی ملی۔