امریکی صدر جوبائیڈن کا 31 اگست تک افغانستان سے انخلاء مکمل کرنے کا اعلان

واشنگٹن: امریکا کے صدر جوبائیڈن نے 31 اگست تک افغانستان سے انخلاء مکمل کرنے کا اعلان کرتے ہوئے کہا ہے کہ دہشت گرد حملوں کے بڑھتے ہوئے خطرے کی وجہ سے تیزی سے انخلا ء کی ضرورت ہے۔

جوبائیڈن نے طالبان کے زیر کنٹرول کابل سے امریکی و افغان شہریوں اور امریکی فوجیوں کے انخلاء  کے منصوبے کے بارے میں کہا کہ جتنی جلدی ہم انخلاء کا عمل ختم کر سکتے ہیں اتنا ہی بہتر ہے۔آپریشن کا ہر دن ہمارے فوجیوں کے لیے اضافی خطرہ لاتا ہے۔

مزید پڑھیں:افغانستان کی بدلتی فضاء

جوبائیڈن کاکہنا ہے کہ ہم 31 اگست تک انخلاء مکمل کرنے کیلئے پرامید ہیں تاہم 31 اگست تک انخلاء مکمل کرناطالبان کے تعاون جاری رکھنے اور ان لوگوں کے لیے ہوائی اڈے تک رسائی کی اجازت دینے پر منحصر ہے جنہیں ہم باہر لے جا رہے ہیں۔

دوسری جانب امریکا کے ایوانِ نمائندگان کی انٹیلی جنس کمیٹی کے چیئرمین ایڈم شف نے کہا ہے کہ انھیں نہیں لگتا کہ 31 اگست تک افغانستان سے تمام امریکی شہریوں اور ان کے اتحادیوں کو نکالنے کا کام مکمل ہو سکے گا۔

ہاؤس انٹیلی جنس کمیٹی کی بریفنگ کے بعد رپورٹرز سے بات کرتے ہوئے انھوں نے کہاکہ یہ ممکن تو ہے لیکن اس کا امکان بہت کم ہے،جتنے امریکی شہریوں کو اب بھی نکالنا باقی ہے، جتنے صحافیوں، سِول سوسائٹی اور خواتین رہنماوں کو نکالنا ہے، مجھے نہیں لگ رہا کہ یہ مہینے کے آخر تک ممکن ہوگا۔

انھوں نے کہا کہ امریکہ کی جانب سے ایک دن میں 11 ہزار افراد کو نکالنے کا ریکارڈ خوش آئند ہے تاہم عملی مشکلات کے باعث میرا نظریہ ہے کہ ہمیں اپنی افواج کو تب تک وہیں رکھنا چاہیے جب تک تمام امریکیوں کو وہاں سے نکال نہ لیا جائے اور اپنے افغان اتحادیوں کا حق ادا نہ کر دیا جائے۔