گورنمنٹ گرلز کالج PECHSمیں غیر متعلقہ افراد کا دھاوا،طالبات خوف کاشکار، والدین پریشان

کراچی : گورنمنٹ گرلز کالج پی ای سی ایچ ایس میں غیر متعلقہ افراد کا دھاوا، سپرنٹنڈنٹ کے دفتر میں گھس کر غل غپاڑہ، نعرے بازی ، طالبات ہراساں، والدین میں تشویش کی لہر، پرنسپل نے ڈائریکٹر کالجز کو مطلع کردیا۔

شہر کے معیاری سرکاری ادارے گورنمنٹ گرلز کالج پی ای سی ایچ ایس میں گزشتہ روز20سے زائدغیر افراد گھس گئے اور کالج کے سپرنٹنڈنٹ افضل بیگ کے ہمراہ سرکاری دفتر میں نعرے بازی کی جس پرکالج کی ڈسپلن کمیٹی کی انچارج رخسانہ میرانی نے ان لوگوں کو منع کیا کہ کالج میں پرنسپل رخسانہ بلوچ کو اطلاع دی کہ گرلز کالج میں 20 سے 30 افراد گھس آئے ہیں جن میں وہ صرف ایک شخص نے اپنا نام شاہ رضا بتایا ہے۔

اس حوالے سے گریڈ 20کی افسر پرنسپل رخسانہ بلوچ نے سیکریٹری کالج ، ڈائریکٹر جنرل کالج اور ریجنل ڈائریکٹر کالجز کو اطلاع دی ہے جس میں بتایا ہے کہ جمعرات کو کالج کا سپرنٹنڈنٹ افضل بیگ میرے پاس آیا تھا اور اس نے کہا کہ ہم کالج میں کیک کاٹنا چاہتے ہیں اور باہر سے 10سے 20لوگ بھی آئیں گے جس کے بعد میں نے اسے منع کیا کہ خواتین کے کالج میں ایسی کسی سرگرمی کی قطعاً کوئی گنجائش نہیں ہے لہٰذا یہاں کوئی پروگرا م کرنے کے بجائے کسی بوائز کالج کا رخ کریں ۔

جس کے بعد جمعہ کو کالج میں 20 سے 30افراد سپرنٹنڈنٹ شاہ رضا کی معیت میں زبردستی داخل ہوئے اور خواتین کو ہراساں کیااو ہلڑ بازی بھی کی اور سرکاری دفتر میں گھس کرکیک کاٹنے کی تقریب کی جس پر خواتین اساتذہ سمیت طالبات میں شدید بے چینی پائی جارہی ہے اور والدین کے تشویش بھرے فون آرہے ہیں کہ کالج میں کون غیر متعلقہ لوگ آئے ہیں لہٰذا اس سپرنٹنڈنٹ افضل بیگ سمیت اس کے 30 سے زائد ساتھیوں کے خلاف کارروائی عمل میں لائی جائے۔

مزید پڑھیں:

محکمہ تعلیم کالجز نے گیارہویں کے داخلوں کیلئے انوکھی شرائط عائد کردیں

کالج میں مسلح افراد کے گھسنے کا معاملہ سلجھنے کے بجائے مزید الجھ گیا

کراچی میں نجی اسکول کے لیڈیز واش روم سے خفیہ کیمرے نکل آئے،رجسٹریشن منسوخ

ناظم آباد گرلز کالج میں 8 مسلح افراد کا دھاوا، انکوائری کمیٹی خاموش، اجلاس بھی نہ ہو سکا

معلوم رہے کہ مذکورہ ویڈیو میں سنا جاسکتا ہے کہ کالج میں آنے والے افراد اپنا تعلق سندھ کالج نان ٹیچنگ ویلفیئر ایسوسی ایشن(شاہ رضا گروپ )سے بتا رہے ہیں جو کالجز کی غیر تدریسی عمال کی غیر رجسٹرڈ تنظیم ہے جبکہ کالجز کے غیر تدریسی عمال کی اصل رجسٹرڈ تنظیم آل پاکستان کلرک ایسوسی ایشن (ایپکا) ہے جس میں بھی دھڑے بندی ہو چکی ہے ۔

اس حوالے سے سپلا کراچی کے رہنما منور عباس اور عزیز اللہ میمن کا کہنا ہے کہ کسی بھی گرلز کالج میں ہم خود جانے سے اعراض کرتے ہیں تاہم اتنی بڑی تعداد میں مرد حضرات کو گرلز کالج میں آنا سمجھ سے نہیں آتا کیوں کہ گرلز کالج میں مرد حضرات کا اس طرح کا پروگرام کرنا ممنوع ہے جس کی شدید مذمت کرتے ہیں اور اس حوالے سے سپلا کا وفد ہفتہ کو کالج جائے گا اور پرنسپل سمیت خواتین کو ملنے والی دھمکیوں پر ان کی بات چیت کوہر فورم پر اٹھایا جائے گا ۔

ادھر رابطہ کرنے پر کالج کی پرنسپل پروفیسر رخسانہ بلوچ کا کہنا ہے کہ مجھے شاہ رضا دھمکیاں دے رہا ہے کہ اگر ہمارے بندے (افضل بیگ )کو ٹرانسفر کیا یا کوئی کارروائی کی تو میں تمہیں دیکھ لوں گا۔اس لئے میں نے سیکریٹری کالجز ، ڈی جی کالجز اور آر ڈی کالجز کو زبانی آگاہ کردیا ہے اور کل تحریری طورپر ان کے علم میں مکمل واقعہ لائوں گی جس پر امید ہے کارروائی ہو گی کیوں کہ یہاں والدین کے اعتماد اور طلبا و طالبات کو بھی تشویش لاحق ہو گئی ہے۔

معلوم ہوا ہے کہ سپرنٹنڈنٹ افضل بیگ اصل میں کلاس فور بھرتی ہوا تھا جس نے غیر قانونی ترقی پا کر خود کا کیڈر تبدیل کراکے سپرنٹنڈنٹ بنوا لیا ہے ، افضل بیگ اس سے قبل کالج میں یونیفارم فروخت کرنے اور جعلی ایڈمیشن کرنے میں ملوث پایا گیا ہے جبکہ شاہ رضا غیر تدریسی افراد کے پیسوں کے عوض تبادلے کرانے کی شہرت رکھتے ہیں ، معلوم ہوا ہے کہ شاہ رضا رعنا لیاقت کالج میں بھی خاتون اسٹاف کو بلیک میل کرتے ہیں جس نے تحریر ی شکایات کر رکھی ہے۔