چوہدری سرور کی برطرفی، عمر سرفراز چیمہ نئے گورنر پنجاب مقرر

لاہور: گورنر پنجاب چوہدری محمد سرور کو عہدے سے برطرف کیے جانے کے بعد عمر چیمہ کا نام گورنر کے طورپر سامنے آیا ہے۔ ذرائع کا دعویٰ ہے کہ عمر سرفراز چیمہ کو نیا گورنر پنجاب مقرر کردیا گیا ہے۔

تفصیلات کے مطابق پی ٹی آئی حکومت نے چوہدری محمد سرور کو آج گورنر پنجاب کے عہدے سے برطرف کردیا جس کی وزیرِ اطلاعات فواد چوہدری نے کوئی وجہ نہیں بتائی تاہم پاکستانی میڈیا کا دعویٰ تھا کہ چوہدری سرور علیم خان گروپ کو سپورٹ کر رہے تھے۔ 

یہ بھی پڑھیں:

حکومت کا بڑا فیصلہ، گورنر پنجاب چوہدری محمد سرور عہدے سے برطرف

میڈیا دعوے کے مطابق چوہدری سرور کے علیم خان گروپ کو سپورٹ کرنے کی اطلاعات وزیر اعظم عمران خان تک پہنچ گئی تھیں جس پر تحریکِ انصاف حکومت نے انہیں عہدے سے ہٹانے کا اصولی فیصلہ کر لیا۔

واضح رہے کہ عمر سرفراز چیمہ کو جنوری 2019 میں پی ٹی آئی کا مرکزی سیکریٹری اطلاعات مقرر کیا گیا تھا جو پہلے بھی تحریکِ انصاف کی سیاسی خدمت کے دوران مختلف عہدوں پر کام کرچکے ہیں۔

اپریل 1996 میں تحریکِ انصاف میں شمولیت اختیار کرنے والے عمر سرفراز چیمہ اس سے قبل بھی مرکزی سیکریٹری اطلاعات کے عہدے پر 5سال کام کرچکے تھے اور انہیں مختصر وقت کیلئے چیئرمین عمران خان کا ترجمان بھی مقرر کیا گیا تھا۔