یوکرینی وزیر خارجہ نے نیٹو اتحادیوں سے جنگی حالات سے نمٹنے کیلئے مزید اسلحہ فراہم کرنے کی اپیل کردی۔
غیر ملکی میڈیا کے مطابق یوکرین کے وزیر خارجہ دمترو کولیبا نے کہا ہے کہ ہم اپنے نیٹو اتحادیوں سے اپیل کریں گے کہ ہمیں مزید اسلحہ بھیجیں، اس طرح جنگ یوکرین تک محدود رہے گی اور دیگر ممالک میں نہیں پھیلے گی۔
یوکرینی وزیرخارجہ کا کہنا تھا کہ میں نیٹو اتحادیوں کو پیغام دینا چاہتا ہوں کہ جس قدر اور زیادہ تیزی سے ہمیں اسلحہ ملے گا اُتنی ہی تیزی سے انسانی زندگیاں محفوظ ہوسکیں گی، حملے کے لئے اسلحے کی فراہمی یا پھر دفاعی مقاصد کے لئے اسلحے کی فراہمی کے درمیان تفریق کرنا فیلڈ کی صورتحال کے حوالے سے بے معنی ہے۔
مزید برآں روس پر عائد پابندیوں کے بارے میں یوکرین کے وزیر خارجہ کا کہنا تھا کہ ایک ہفتہ قبل تک پابندیوں کے بارے میں تجاویز نہایت ضعیف تھیں، ہم اس معاملے میں بہت ناامید تھے، پابندیاں ابھی تک یوکرین کی طلب کردہ سطح پر نہیں ہیں، ہم روس پر پیٹرول اور گیس کی مکمل پابندیوں کے اطلاق پر زور دینا جاری رکھیں گے۔
یہ بھی پڑھیں:فیفا ورلڈکپ، قطر میں سیکیورٹی گارڈز جبری مزدوری کیلئے مجبور، ایمنسٹی انٹر نیشنل