متحدہ عرب امارات کا سیلاب زدگان کیلئے پاکستان کو 5 کروڑ درہم امداد دینے کا اعلان

دبئی: یو اے ای کے وزیر اعظم شیخ محمد بن راشد المکتوم کی ہدایت پر متحدہ عرب امارات نے سیلاب زدگان کیلئے پاکستان کو 5 کروڑ درہم امداد دینے کا اعلان کیا ہے۔

تفصیلات کے مطابق متحدہ عرب امارات کی جانب سے پاکستان کو 5 کروڑ درہم کی امداد محمد بن راشد المکتوم گلوبل انیشیٹیو اور ورلڈ فوڈ پروگرام کے تعاون سے دی جائے گی جس کا اس سے قبل وزیر اعظم پاکستان نے بھی ذکر کیا۔

یہ بھی پڑھیں:

یو اے ای سے سیلاب متاثرین کیلئے امدادی سامان کی پہلی کھیپ پاکستان پہنچ گئی

اپنے ایک بیان میں وزیر اعظم کا کہنا تھا کہ متحدہ عرب امارات سیلاب زدگان کی امداد کیلئے پاکستان کو 50 ملین مالیت کا سامان مہیا کرے گا۔ میری یو اے ای کے صدر محمد بن زاید سے ٹیلیفونک گفتگو ہوئی ہے۔

وزیر اعظم نے کہا کہ متحدہ عرب امارات نے پاکستان کو امدادی سامان مہیا کرنا شروع کردیا ہے۔ صدرِ یو اے ای نے سیلاب متاثرین کی امداد جاری رکھنے کی یقین دہانی کرائی ہے۔ 5 کروڑ مالیت کا سامان عطیہ کیا جائے گا۔

خیال رہے کہ اس سے قبل متحدہ عرب امارات (یو اے ای) کی جانب سے پاکستان کے سیلاب متاثرین کیلئے امدادی سامان کی پہلی کھیپ پاکستان پہنچ گئی، یواے ای کی جانب سے بھیجی گئی امداد میں خیمے، خوراک، ادویات اور دیگر اشیا شامل تھیں۔

وفاقی وزیر اطلاعات و نشریات مریم اورنگزیب کا 28 اگست کو کہنا تھا کہ یو اے ای کی جانب سے امداد ی سامان لے کر مزید 15طیارے آئندہ چند روز میں پاکستان آئیں گے، یہ پہلی پرواز ہے جو امداد لے کر پہنچی ہے۔