کالعدم ٹی ٹی پی کا پاکستان سے جنگ بندی ختم کرنے کا اعلان، دہشتگردی کا خدشہ

پشاور: کالعدم تحریکِ طالبان (ٹی ٹی پی) نے پاکستان سے جنگ بندی ختم کرنے کا اعلان کیا ہے جس سے ملک بھر میں دہشت گردی میں اضافے کا خدشہ ہے۔

تفصیلات کے مطابق ترجمان ٹی ٹی پی محمد خراسانی نے اپنے بیان میں کہا کہ پاکستان سے بامقصد مذاکرات نہیں ہوئے جس پر جنگ بندی معاہدہ ختم کرنے کا اعلان کرتے ہیں۔ قیدیوں کی رہائی اور فوجی آپریشن سمیت مؤثر رابطے کا فقدان بھی معاہدے کے اختتام کا باعث ہے۔

یہ بھی پڑھیں:

سندھ میں سیلاب سے نقصان، 215بچوں سمیت 492افراد جاں بحق

ترجمان کالعدم ٹی ٹی پی کے بیان کے مطابق دہشت گرد تنظیم کے کچھ قیدیوں کو رہا تو کیا گیا تاہم انہیں دوبارہ سے گرفتار کرلیا گیا جسے ٹی ٹی پی نے معاہدے کی خلاف ورزی قرار دیا۔ چیف ٹی ٹی پی مفتی نور ولی کا کہنا تھا کہ ہم نے بامقصد مذاکرات کی کبھی نفی نہیں کی ہے۔

خیال رہے کہ تحریکِ طالبان پاکستان کے متعدد دہشت گرد سکیورٹی اداروں کے ہاتھوں گرفتار اور ہلاک ہوچکے ہیں۔ چیف ٹی ٹی پی کا کہنا تھا کہ بامقصد مذاکرات پر کوئی پیشرفت نہ ہونے کے باعث جدوجہد جاری رکھی جائے گی۔ کامیاب مذاکرات پر آئندہ کا لائحۂ عمل طے کریں گے۔ 

گزشتہ برس اکتوبر کے دوران افغان حکومت کی ثالثی میں پاکستان اور ٹی ٹی پی کے مابین مذاکرات عمران خان دورِ حکومت میں شروع ہوئے جنہیں موجودہ مسلم لیگ (ن) کی حکومت بھی جاری رکھے ہوئے تھی تاہم مذاکرات سے دہشت گردی کے مسئلے کا خاطر خواہ حل برآمد نہیں ہوسکا۔

وفاقی حکومت مختلف مواقع پر فاٹا کی سابق حیثیت میں بحالی اور کالعدم ٹی ٹی پی دہشت گردوں کی رہائی جیسے معاملات پر بیانات جاری کرچکی ہے۔ وزیر خارجہ بلاول بھٹو زرداری نے بھی ٹی ٹی پی سے مذاکرات کا اعتراف کیا تھا، تاہم مذاکرات پر ڈیڈ لاک تاحال برقرار ہے۔