گوگل نیوز پر ہمیں فالو کریںکراچی کے علاقے گلبہار میں ایک رہائشی فلیٹ میں گیس بھر جانے کے باعث ہونے والے دھماکے سے آگ بھڑک اٹھی جس کے نتیجے میں ایک 50 سالہ خاتون جھلس کر جاں بحق ہو گئیں۔
یہ افسوسناک واقعہ جمعرات کو قومی میڈیا کی رپورٹس میں سامنے آیا۔پولیس کے مطابق دھماکہ گلبہار کے ایک رہائشی عمارت کی نچلی منزل پر اس وقت ہوا جب فلیٹ میں گیس لیکج کے باعث فضا میں گیس جمع ہو گئی تھی۔
دھماکے کے بعد آگ لگ گئی جس نے خاتون کو بری طرح جھلسا دیا جو بعد میں زخموں کی تاب نہ لاتے ہوئے دم توڑ گئیں۔
ابتدائی تحقیقات کے مطابق دھماکہ ممکنہ طور پر شارٹ سرکٹ یا کسی چنگاری کے باعث ہوا۔ پولیس نے واقعے کی مزید تفتیش شروع کر دی ہے۔
یہ بات قابل توجہ ہے کہ حالیہ دنوں میں کراچی میں آتشزدگی کے واقعات میں خطرناک حد تک اضافہ ہوا ہے۔
کچھ روز قبل گلستانِ جوہر کے مصروف ترین تجارتی مرکز ملینیم مال میں بھی ایک ہولناک آگ بھڑک اٹھی تھی جو 17 اور 18 جون کی درمیانی شب پیش آئی۔
ریسکیو ذرائع کے مطابق آگ مال کی تیسری منزل پر موجود کنٹرول روم سے لگی، جہاں بجلی کے نظام میں شارٹ سرکٹ سے شعلے بلند ہوئے۔
تیز ہواؤں، ناقص فائر سسٹم اور چھت پر نصب برقی چِلرز نے صورتحال کو مزید سنگین بنا دیا۔ آگ تیزی سے چھت سے نچلی منزلوں تک پھیل گئی۔
