گوگل نیوز پر ہمیں فالو کریںکراچی: وزیر بلدیات سندھ و چیئرمین واٹر بورڈ سید ناصر حسین شاہ اور ایم ڈی واٹر بورڈ انجینئر اسداللہ خان کی ہدایات پر اینٹی تھیفٹ سیل واٹر بورڈ نے کارروائیاں مزید تیز کردیں، اینٹی تھیفٹ سیل واٹر بورڈ نے آپریشن کرکے ڈسٹرکٹ ویسٹ میں 5 اور ڈسٹرکٹ ایسٹ میں 1 غیر قانونی ہائیڈرنٹس مسمار اور کئی غیر قانونی کنکشن منقطع کردیئے ہیں۔
آپریشن انچارج اینٹی تھیفٹ سیل واٹر بورڈ عبدالواحد شیخ کی سربراہی میں ہوا، انچارج اینٹی تھیفٹ سیل کا کہنا تھا کہ ملزمان ایوب گوٹھ میں واٹر بورڈ کی لائن سے 3 اور 4 انچ کے غیر قانونی کنکشنز اور بنگالی موڑ پر ایک غیر قانونی ہائیڈرنٹ چلا رہے تھے۔
اس کے علاوہ ڈسٹرکٹ ویسٹ کے پیرآباد، منگھو پیر اور اورنگی تھانہ کے حدود میں 5 غیر قانونی ہائیڈرنٹس کے ذریعے ڈسٹرکٹ ایسٹ اور ویسٹ کا پانی ٹینکروں کے ذریعے چوری کرکے سپر ہائی وے انڈسٹریل ایریاز اور شہر کے مختلف علاقوں میں فروخت کرتے تھے وہ غیر قانونی کنکشن منقطع جبکہ 6 ہائیڈرنٹس مسمار کردئیے گئے ہیں۔
انکا مزید کہنا تھا کہ کارروائی کے دوران 8 ٹینکرز، ہیوی پمپس، جنریٹرز اور سیکڑوں فٹ پائپ قبضہ میں لے کر متعلقہ تھانوں میں جمع کروا دیے ہیں، جبکہ ملوث ملزمان کے خلاف، سہراب گوٹھ، سائٹ انڈسٹریل ایریا، پیرآباد، منگھو پیر اور اورنگی تھانہ میں پانی چوری کے نئے قانون کے تحت مقدمات درج کروا دیئے گئے ہیں۔
مزید پڑھیں: واٹر بورڈ کی غفلت کے باعث صنعتوں کوپانی کی فراہمی متاثرہورہی ہے، فیصل معیز خان
