اومیکرون کے خدشات، امریکا نے چین کی پروازوں پر پابندی عائد کردی

واشنگٹن: اومیکرون پھیلنے کے خطرے کے پیش نظر امریکا نے بھی چین سے آنے والی 44 پروازیں 2 ماہ کے لیے معطل کردیں۔

بین الاقوامی خبر رساں ادارے کا کہنا ہے کہ امریکا نے کورونا کی نئی قسم اومیکرون کے پھیلاؤ کو روکنے کے لیے چین سے آنے والی پروازوں پر 30 جنوری سے پابندی عائد کردی۔

اس حوالے سے امریکی حکام کا کہنا ہے کہ چین سے آنے والی 44 پروازوں پر عائد پابندی 29 مارچ تک برقرار رہے گی اور اس پر سختی سے عملدرآمد ہوگا۔

امریکا نے چینی پروازوں کی معطلی کا فیصلہ چین کی 4 فضائی کمپنیوں کی جانب سے امریکا کے لیے پروازوں پر پابندی عائد کرنے کے بعد کیا۔

اس سے قبل چین بھی چند مریضوں میں کورونا کی تصدیق کے بعد متحدہ عرب امارات کی 20 اور امریکا کی 10 پروازوں پر 31 دسمبر سے پابندی عائد کر چکا ہے۔

مزید پڑھیں: یوکرائن پر ممکنہ حملہ، امریکی صدر جوبائیڈن کی روس کو دھمکی

واضح رہے کہ دنیا بھر میں اومیکرون کے کیسز میں اضافے کے بعد سے دنیا بھر میں نرم کی گئیں کورونا پابندیوں کا دوبارہ نفاذ کیا جا رہا ہے۔پاکستان میں بھی اس حوالے سے اقدامات کئے جارہے ہیں۔