دبئی میں پاکستانیوں کے داخلے کیلئے ویکسینیشن کارڈ کی شرط ختم کردی گئی

دبئی:دبئی میں پاکستانیوں کے داخلے کیلئے ویکسینیشن کارڈ کی شرط ختم کردی گئی۔دبئی ائیرپورٹ حکام کے مطابق متحدہ عرب امارات کی ریاست دبئی کا رہائشی ویزہ رکھنے والے افراد داخلے کے اہل ہوں گے۔

دبئی میں داخلے کے لیے اب پاکستانیوں کو ویکسینیشن کارڈ کی ضرورت نہیں ہوگی۔ ائیرپورٹ حکام کے مطابق مسافروں کو دبئی میں داخلے کے لیے پہلے دبئی حکام سے اجازت نامہ حاصل کرنا ہوگا۔

نئے حکم نامے میں 48 گھنٹے پہلے پی سی آر ٹیسٹ اور چار گھنٹے پہلے ریپڈ ٹیسٹ کی شرط برقرار رکھی گئی ہے اور مسافروں کا دبئی پہنچنے پر کورونا ٹیسٹ بھی کیا جائیگا۔

دبئی ائیرپورٹ حکام کے مطابق دبئی کے سفر کیلئے نئی ہدایات پاکستان، سری لنکا، نیپال اور بھارت سے آنے والے مسافروں پر لاگو ہوں گی۔جبکہ دیگر ممالک سے آنے والے مسافروں کے لئے وہی پرانے قوانین لاگو ہوں گے۔

مزید پڑھیں: پاکستان نے بیرون ملک مخالفین کے خلاف کریک ڈاؤن کی رپورٹ کو مسترد کردیا

واضح رہے کہ دبئی کے حکام کی جانب سے گزشتہ کچھ دنوں قبل کورونا وباء میں اضافے کے باعث پاکستان سے آنے والے مسافروں کے لئے سفری پابندیاں عائد کردی گئی تھی، جن میں آہستہ آہستہ کمی واقع ہورہی ہے۔