پشاور جلسہ اعلان کردہ شیڈول کے مطابق منعقد ہوگا، نیئر حسین بخاری

اسلام آباد: سیکرٹری جنرل پاکستان پیپلز پارٹی نیر حسین بخاری نے کہا ہے کہ پشاور جلسہ پی ڈی ایم کے اعلان کردہ شیڈول کے مطابق منعقد ہوگا۔

نیر بخاری کا کہنا تھا کہ پی ڈی ایم پشاور تاریخی جلسہ خیبر پختونخواہ سے پی ٹی آئی سرکار کے خلاف عوامی ریفرینڈم ہوگا۔ انہوں نے کہاکہ ناکام نااہل اور نالائق حکمرانوں میں عوامی جلسوں کا سامنا کرنے کی ہمت نہیں۔

انہوں نے کہا کہ پی ڈی ایم کے سیاسی جمہوری عوامی پلیٹ فارم نے قصر بنی گالااور سرکاری ایوان لرزا دیئے ہیں۔ انہوں نے کہاکہ عقل کے اندھے حکمرانوں نے کرونا بھی ایک نہیں دو بنا دیئے ہیں۔

ایک وہ جو پی ٹی آئی سرکار وزیراعظم وزرا کے خطاب اور سرکاری تقریبات میں غائب رہتا ہے،دوسرا کرونا وہ ہے جو صرف پی ڈی ایم جلسوں کے موقع پر تیزی سے پھیلتا ہے۔

انہوں نے کہاکہ پرامن سیاسی سرگرمی اور عوامی احتجاج کے آئینی حق استعمال کرنے سے نہیں روکا جا سکتا،پی ڈی ایم غیر آئینی اور غیر جمہوری سوچ کے خلاف میدان عمل میں ہے۔

نیئر حسین بخاری نے کہاکہ قوم حکومتی خاندانوں میں قومی خزانے کی بندر بانٹ کا احتساب اور حساب چاہتی ہے،حکمران سرکاری ہتھکنڈوں اور گھٹیا حربوں سے عوامی غیض و غضب کو دعوت دینے سے باز رہیں۔

مزید پڑھیں: پشاور، ضلعی انتظامیہ نے پی ڈی ایم کوجلسے کی اجازت دینے سے انکارکردیا