ملک بھر میں کورونا وائرس کے مریضوں کی تعداد4974 تک پہنچ گئی

کراچی: ملک بھر میں کورونا کے تصدیق شدہ مریضوں کی تعداد 4974تک پہنچ گئی ہے جب کہ اس وائرس سے جاں بحق افراد کی تعداد 80 ہوگئی ہے۔

نیشنل کمانڈ اینڈ کنٹرول سینٹر کے مطابق گزشتہ 24 گھنٹوں کے دوران ملک بھر میں کورونا کے 2457 مشتبہ مریضوں کے ٹیسٹ کیئے گئے جن میں سے 223 افرادمیں کورونا وائرس کی تصدیق ہوگئی ہے، اس طرح ملک بھر میں کورونا وائرس سے متاثرہ افراد کی تعداد 4974ہو گئی ہے۔

ذرائع کے مطابق اب تک پنجاب میں 2410،سندھ 1380، بلوچستان 228، خیبر پختونخوا میں 656، آزاد کشمیر34، اسلام آباد میں 113 اور گلگت بلتستان میں 215 کیسز رپورٹ ہوچکے ہیں۔

حکومتی اعداد و شمار کے مطابق ملک بھر میں گزشتہ 24 گھنٹوں کے دوران 6 افراد کورونا کے ہاتھوں زندگی کی بازی ہار گئے، اس طرح وطن عزیز میں اس مہلک وائرس سے جاں بحق مریضوں کی تعداد 80 ہوگئی ہے جب کہ 31 کی حالت تشویشناک ہے تاہم 762 افراد اس بیماری کو شکست دینے میں کامیاب بھی ہوئے ہیں۔