قومی ویمنز کرکٹ ٹیم نے سری لنکا کو 8 وکٹوں سے شکست دیدی

لاہور: قومی ویمنز کرکٹ ٹیم نے سری لنکا کیخلاف پہلے ون ڈے انٹرنیشنل میچ میں 8 وکٹوں سے جیت کر آئی سی سی رینکنگ چیمپئین شپ میں 2 قیمتی پوائنٹس اپنے نام کرلیے۔

تفصیلات کے مطابق آئی سی سی رینکنگ چیمپئین شپ کا حصہ ویمنز انٹرنیشنل ون ڈے سیریز کے پہلے میچ میں پاکستان نے کامیابی کے لیے 170 رنز کا آسان ہدف 2 وکٹیں کھو کر41.5 اوورز میں حاصل کرلیا، 25 رنز کے اسکور پر اوپنر منیبہ علی کے 14 رنز بناکر آوٹ ہونے کے بعد کپتان 30 سالہ بسمعہ معروف اور ان کی ہم عمر سدرا مین نے ہدف کے تعاقب میں دوسری وکٹ کی شراکت میں 143 رنز بناکر اپنی ٹیم کو فتح کے دھانے پر پہنچایا۔

یہ بھی پڑھیں: بسمہ معروف کو کامن ویلتھ گیمز کے دوران بیٹی کے ساتھ رہنے کی اجازت مل گئی

خیال رہے کہ 41 ویں اوور کی پہلی گیند پر آئی سی سی کی بیٹنگ رینکنگ میں 53 ویں پوزیشن کی حامل سدرا امین اپنی وکٹ گنوا بیٹھیں، انہوں نے 118 گیندوں پر 7 چوکوں کی مدد سے 76 رنز بنائے، بہترین فارم کا مظاہرہ کرنے والی قومی ویمن کپتان بسمعہ معروف نے 101 گیندوں پر ناقابل شکست 62 رنز بنائے جن میں 4 چوکے بھی شامل تھے۔

سری لنکن ویمن ٹیم کی بالر اچنی کولا سوریا اور اوشادی رانا سن سنگھے نے 1، 1 وکٹ باہم تقسیم کی، ساوتھ اینڈ کلب گراؤنڈ، ڈی ایچ اے پر ویمنز ٹی ٹوئنٹی انٹرنیشنل سیریز کے تینوں میچز میں ناکامی سے دوچار ہونے والی سری لنکا کی ٹیم نے مسلسل چوتھی مرتبہ ٹاس جیت کر پہلے بیٹنگ کا فیصلہ کیا لیکن وہ پاکستانی بولرز کے سامنے ایک مرتبہ پھر بے بس نظر آئی اور مقررہ 50 اوورز کی اننگ کے 47.5 اوورز ہی میں 169 رنز پر ڈھیر ہوگئی۔

پاکستان کی جانب سے کھلاڑی غلام فاطمہ نے 4 ، سدرہ اقبال اور فاطمہ ثناء نے دو دو کھلاڑیوں کو میدان بدر کیا۔