وزیرِ خارجہ کی زبان پھسل گئی، توشہ خانہ کو توچہ خانہ کہہ دیا

چیئرمین پیپلز پارٹی اور وزیرِ خارجہ بلاول بھٹو زرداری کی لاڑکانہ میں عوامی جلسے سے خطاب کے دوران زبان پھسل گئی اور انہوں نے توچہ خانہ کو توشہ خانہ کہہ دیا۔

گزشتہ روز لاڑکانہ میں عوامی اجتماع سے خطاب کرتے ہوئے بلاول بھٹو کا کہنا تھا کہ بے نظير بھٹو کی سالگرہ کی تقریب پر بہت خوشی ہورہی ہے، بے نظير بھٹو ملک اور عوام کی ترقی کيلئے 30 سال جدوجہد کرتی رہيں۔

بلاول بھٹو زرداری نے کہا کہ بے نظير بھٹو اس ملک کےعوام کی آواز تھیں، ايک طرف بے نظیر بھٹو تھيں، دوسری طرف ظلم تھا، بے نظیر کل بھی زندہ تھيں آج بھی کارکن کی صورت میں زندہ ہیں۔

وزیرخارجہ کا کہنا تھا کہ ملکی تاريخ ميں پہلی بارعدم اعتماد کی تحريک کامياب ہوئی، یہ بينظير کے کارکنان، جيالے تھے جنہوں نے ايک دن کيلئے سليکٹڈ کو نہيں مانا کیونکہ يہ سليکٹڈ شخص آئينی اور معاشی حقوق پرحملے کرتارہا۔

یہ بھی پڑھیں:

امریکہ کی پاکستان میں ”مداخلتوں“کی ڈرامائی داستان

وزیرِ خارجہ نے کہا کہ ہم نے تمام جماعتوں کيساتھ مل کرآئينی طريقے سے اس کی حکومت ختم کی مگر حکومت سنبھالنے کے بعد اندازہ ہورہا ہے اس نے ملک کيساتھ کيا کيا ہے۔

انہوں نے کہا کہ آئی ايم ايف ڈيل پڑھی توحيران ہوئے کہ يہ عوام کيساتھ کيا مذاق کيا گيا،عمران خان نے سبسڈی کے نام پر گيم کھيلا، 4 سال میں عالمی طور پر پاکستان کو بہت نقصان پہنچا مگر وزيراعظم کی ٹيم نے پاکستان کو ديواليہ ہونے سے بچايا۔

وزیرخارجہ کا مزید کہنا تھا کہ جب سے وزيرخارجہ بنا ايک دن چين سے نہيں بيٹھا، ہماری خارجہ پاليسی ہے تجارت چاہتے ہيں،بھيک نہيں مانگيں گے۔

انہوں نے کہا کہ ہم پاکستان کے نام کا دنيا بھرميں دفاع کريں گے، ہم پاکستان کے دوسرے ممالک کيساتھ تعلقات بہترکريں گے، ہم نے امريکا سے تجارت پر بات کی۔

بلاول بھٹوزرداری کا کہنا تھا کہ فيٹف ميں پاکستان کيخلاف ايف آئی آرز کٹی ہوئيں تھيں، جن سے کام لينا تھا ہم ان کو گالی دے رہے تھے مگر ہم نے دوسرے ممالک کو سمجھايا ہم فيٹف کے نکات پورے کرچکے ہيں۔

وزیرخارجہ کا کہنا تھا کہ فيٹف کی ٹيم کے دورے سے پہلےہم گرے لسٹ سےنکل جائيں گے۔

بلاول بھٹو کا کہنا تھا کہ پاکستان کو آصف زرداری کی سربراہی ميں جی ايس پی پلس کااسٹيٹس ملا جو عمران خان کی وجہ سے خطرے ميں ہے،انہوں نے کہا کہ فيٹف کے بعد جی ايس پی پلس اسٹيٹس،ايکسپورٹ کيلئے خوشخبری لائيں گے۔

چیئرمین پیپلزپارٹی کا مزید کہنا تھا کہ عمران نيازی آزاد پھر رہا ہے اور دوسروں پرالزام لگا رہا ہے، عام آدمی اس کے کيے کا بوجھ اٹھا رہا ہے،اس سے حساب لينا چاہيے۔

بلاول بھٹو کا کہنا تھا کہ اُس سے پوچھنا چاہيے کہاں ہے تبديلی؟ کہاں ہيں وعدے؟ جوکرپشن کيخلاف بات کرتا تھا اس کيخلاف کرپشن کی کہانياں نکل رہی ہيں، خان صاحب کا کرپشن کا بيانيہ 100فيصد جھوٹ تھا۔

وزیرخارجہ بلاول بھٹو زرداری کا کہنا تھا کہ عمران خان نے توشہ خانہ ميں رکھنے سے پہلے تحفے بيچنا شروع کرديے، خان صاحب کو تحفے ميں گھڑی ملی انہوں نےاس کوبيچ ديا، توشہ خانہ کے تحفوں کا کيا ہوا آپ کو جواب دينا پڑے گا۔