کراچی میں سالِ نو کی سرد ترین رات، پارہ 10 ڈگری سے بھی گر گیا

شہرِ قائد میں موسمِ سرما کی بارشوں نے اعتدال پسند موسم کو سرد سے سرد ترین کردیا، 8 جنوری کی شب شہریوں کا ٹھنڈ سے براحال رہا، سرد ترین رات میں درجۂ حرارت 10 ڈگری سینٹی گریڈ سے بھی نیچے گر گیا۔

تفصیلات کے مطابق کراچی میں درجۂ حرارت نقطۂ اعتدال سے نقطۂ انجماد کی جانب گامزن ہے۔ 8 اور 9 جنوری کی درمیانی شب سردی نے شہریوں کو ہاتھ سینکنے پر مجبور کردیا۔ تیز ہواؤں نے ٹھنڈ میں مزید اضافہ کردیا۔

یہ بھی پڑھیں:

کراچی کے مختلف علاقوں میں تیز بارش، سردی میں مزید اضافہ

محکمۂ موسمیات کے مطابق کراچی میں مزید بارشوں سے سردی میں اضافے کا امکان ہے۔ گزشتہ شب درجۂ حرارت 9.7 ڈگری سینٹی گریڈ رہا۔ آئندہ 24 گھنٹوں میں موسم خشک اور سرد جبکہ درجۂ حرارت 9سے 11ڈگری رہنے کا امکان ہے۔

سردی کی شدت کے متعلق محکمۂ موسمیات کا کہنا ہے کہ شہرِ قائد میں 16 جنوری تک سردی برقرار رہے گی۔ 16 جنوری کے بعد مغربی ہواؤں کا ایک ااور سلسلہ ایران کے راستے سے بلوچستان میں داخل ہوگا۔

موسم کی موجودہ صورتحال کے مطابق ہوا میں نمی 87 فیصد ریکارڈ کی گئی۔ شمال مشرق کی سمت سے کراچی میں چلنے والی ہواؤں کی رفتار 7 کلومیٹر فی گھنٹہ ہے۔ حالیہ بارشوں اور برفباری سے بلوچستان میں بھی سردی کی شدت میں اضافہ ہواہے۔