امریکا میں مسلمانوں کی ٹارگٹ کلنگ شروع، چار شہید

امریکی ریاست نیو میکسیکو میں مسلمانوں کی ٹارگٹ کلنگ کے واقعات سامنے آرہے ہیں جس میں دو پاکستانیوں سمیت 4 افراد جاں بحق ہوچکے ہیں۔

تازہ واقعے میں جمعہ کو 27 سالہ پاکستانی محمد افضل حسین کو شہر البکرکی میں انکے اپارٹمنٹ کے باہر گولی مارکر قتل کیا گیا، پولیس کے مطابق 9 ماہ کے دوران 4 مسلمانوں کو ان کے مذہب اور نسل کی وجہ سے نشانہ بنایا گیا ہے۔

ریاستی پولیس اور وفاقی ادارے ان چاروں مسلمانوں کے قتل کی تحقیقات کر رہے ہیں لیکن تاحال ان ہلاکتوں کے پیچھے محرکات غیر واضح ہیں۔

اطلاعات کے مطابق چاروں مقتولین ایک مقامی مسجد کی انتظامی کمیٹی کے اراکین تھے، ان میں سے دو پاکستانی اور دو افغان تھے، پولیس کے مطابق قتل کے ان چاروں واقعات کے مشترکہ پہلو مقتولین کا مذہب اور ان کا نسلی پس منظر ہے۔

The targeted killings of Muslim residents of Albuquerque is deeply angering and wholly intolerable.

I am sending additional State Police officers to Albuquerque to work in close coordination with APD and the FBI to bring the killer or killers to justice – and they WILL be found.

— Governor Michelle Lujan Grisham (@GovMLG) August 6, 2022

البکرکی کے علاقے کے پولیس چیف نے اپنے بیان میں قتل کے گزشتہ تین کیسز کا حوالہ دیتے ہوئے کہا کہ مقتولین پر گھات لگا کر حملے کیے گئے۔

نیو میکسیکو کی اسٹیٹ پولیس، ایف بی آئی اور یو ایس مارشل سروس سمیت کئی ایجنسیوں نے قتل کے ان واقعات کی تحقیقات شروع کردی ہے۔

مقامی گورنر نے ان واقعات پر اپنے ردعمل میں کہا کہ مسلمان باشندوں کی ٹارگٹ کلنگ شدید غم و غصہ کا باعث اور ناقابل برداشت ہے، قاتلوں کو انصاف کے کٹہرے میں لانے کے لیے اضافی پولیس کو البوکرک بھیجا جارہا ہے۔