تین دہائیوں تک فلم انڈسٹری میں اداکاری کرنے والے سلطان راہی کا یومِ پیدائش

اسلام آباد: پاکستانی شوبز انڈسٹری پر تین دہائیوں تک راج کرنے والے سلطان راہی کا آج 84واں یومِ پیدائش ہے جبکہ اپنے شوبز کیرئیر کے دوران اداکار سلطان راہی نے 700 سے زائد اردو اور پنجابی فلموں میں کام کیا جنہیں آج یاد کیا جارہا ہے۔

تفصیلات کے مطابق سلطان راہی کی زندگی کی داستان بھی فلمی محسوس ہوتی ہے۔سلطان راہی 1938ء میں موجودہ بھارتی صوبے اتر پردیش میں پیدا ہوئے۔  زیادہ تر پنجابی فلمیں کرنے والے اداکار سلطان راہی کا نام گنیز بک آف ورلڈ ریکارڈ میں بھی درج ہوا۔

یہ بھی پڑھیں:

ندا یاسر کے ڈانس کے سوشل میڈیا پر چرچے، ویڈیوز وائرل

بیسویں صدی عیسوی کے دوران اتر پردیش کے شہر سہارنپور میں 24 جون 1938 کو پیدا ہونے والے سلطان راہی  نے کیرئیر کے آغاز میں معمولی رولز کیے۔ بعد ازاں انہیں ولن اور جنگجو کے طور پر رولز ملے اور سلطان راہی ایک سرکش ہیرو بن کر سامنے آئے جسے عوام نے بے حد سراہا۔ 

کم و بیش 30 سال پر محیط اپنے کیرئیر میں فلمسٹار سلطان راہی  نے 160 ایوارڈز اپنے نام کیے۔ انہوں نے مولا جٹ، شیر خان، سالا صاحب، ان داتا اور بشیرا نامی ہٹ فلموں میں کام کیا جبکہ وحشی جٹ اور بشیرا نامی فلمیں بھی یادگار ثابت ہوئیں جن میں ان کے کردار آج بھی سراہے جاتے ہیں۔

مداحوں کا کہنا ہے کہ سلطان راہی نے بے شمار ایسے کردار ادا کیے جنہیں آج بھی یاد کیا جاتا ہے جبکہ سلطان راہی کی وفات کے بعد ان کی جگہ آج تک کوئی نہ لے سکا۔ متعدد اداکاروں نے سلطان راہی بننے کی کوشش کی جن میں اداکار شان شاہد، سعود اور معمر رانا بھی شامل ہیں تاہم کوئی ان کی جگہ لینے میں کامیاب نہ ہوسکا۔

انہیں جاننے والے متعدد افراد کا کہنا ہے کہ سلطان راہی اپنی حقیقی زندگی میں اچھے کردار کے مالک اور انسانیت دوست شخصیت تھے۔ لیجنڈری اداکار  پر ڈاکوؤں نے گوجرانوالہ میں  9 جنوری 1996ء کو فائرنگ کر دی جس سے سلطان راہی  زخموں کی تاب نہ لاتے ہوئے جاں بحق ہو گئے۔ان کی فلمیں آج بھی سراہی جارہی ہیں۔