گوگل نیوز پر ہمیں فالو کریںملٹی میڈیا میسیجنگ پلیٹ فارم اسنیپ چیٹ کو ایک بڑے عالمی تعطل (آؤٹیج) کا سامنا کرنا پڑا، جس کے نتیجے میں پاکستان سمیت کئی ممالک میں صارفین کی سروسز متاثر ہو گئیں۔ صارفین نہ پیغامات بھیج سکے، نہ تصاویر یا ویڈیوز کا تبادلہ کر سکے۔
مانیٹرنگ سروس “ڈاؤن ڈیٹیکٹر” کے مطابق پاکستان، برطانیہ اور فرانس سمیت مختلف علاقوں سے شکایات میں غیر معمولی اضافہ ریکارڈ کیا گیا۔ متاثرہ صارفین میں سے تقریباً 57 فیصد نے بتایا کہ وہ اچانک ایپ سے لاگ آؤٹ ہو گئے، 24 فیصد کو مواد شیئر کرنے میں دشواری پیش آئی، جبکہ 18 فیصد میڈیا اپ لوڈ نہ کر سکے۔
یہ تعطل اتوار کی صبح شروع ہوا اور پاکستان کے بڑے شہروں جیسے لاہور، کراچی، راولپنڈی اور پشاور سے شکایات میں نمایاں اضافہ ہوا۔ پنجاب اور سندھ بھر کے صارفین نے سوشل میڈیا پر اپنی مایوسی کا اظہار کیا۔
تاحال اسنیپ چیٹ کی جانب سے اس آؤٹیج کی کوئی سرکاری وضاحت سامنے نہیں آئی، تاہم بعض ٹیکنالوجی ماہرین کا کہنا ہے کہ مسئلہ سرور کی خرابی یا حالیہ اپ ڈیٹس میں کسی بگ (خرابی) کا نتیجہ ہو سکتا ہے۔
قابلِ ذکر بات یہ ہے کہ کچھ صارفین نے وی پی این (VPN) کے ذریعے ایپ کو کامیابی سے استعمال کیا، جس سے یہ قیاس آرائیاں جنم لیں کہ شاید مسئلہ مخصوص علاقوں یا سرور راستوں سے جڑا ہوا ہے۔
ڈاؤن ڈیٹیکٹر کی جانب سے جاری کردہ ہیٹ میپ نے اس بندش کے عالمی دائرہ کار کو واضح کیا، جس سے ظاہر ہوا کہ مسئلہ صرف کسی ایک خطے تک محدود نہیں۔ یہ پلیٹ فارم صرف اس وقت بندش کی اطلاع دیتا ہے جب صارفین کی شکایات معمول سے کہیں زیادہ ہو جائیں، اور اتوار کو شکایات کی تعداد غیر معمولی رہی۔
پاکستان میں شام 6 بجے کے ڈاؤن ڈیٹیکٹر رپورٹ کے مطابق 53 فیصد صارفین کو رسائی میں مشکل کا سامنا تھا، 28 فیصد مواد شیئر نہ کر سکے، جبکہ 19 فیصد میڈیا اپ لوڈ کرنے میں ناکام رہے۔
