گوگل نیوز پر ہمیں فالو کریںکراچی میں سندھ رینجرز نے فری میڈیکل کیمپ کا اہتمام کیا جس سے 1 ہزار 447 مریض مستفید ہوئے ہیں۔
تفصیلات کے مطابق پاکستان رینجرز (سندھ) کی جانب سے فری میڈیکل کیمپ کا اہتمام کراچی کے علاقے لائنز ایریا میں کھیتون والا اسکول میں کیا گیا جس کے دوران شہریوں کو مفت طبی سہولیات مہیا کی گئیں۔
رینجرز کے میڈیکل کیمپ میں جنرل فزیشن، ماہرِ امراضِ ہڈی و جوڑ، ماہرینِ امراضِ جلد و چشم اور لیڈی ڈاکٹرز کے ساتھ ساتھ رینجرز کے ڈاکٹرز نے خواتین، بچوں اور بزرگ افراد سمیت 1 ہزار 447 مریضوں کا طبی معائنہ، تشخیص اور مفت ادویات فراہم کیں۔
میڈیکل کیمپ میں موبائل لیبارٹریز کے ذریعے مریضوں کے ایکسرے، ٹی بی اور ہیپاٹائٹس کے ٹیسٹ بھی کیے گئے۔ 25 مریضوں کو آئی لینز لگوانے کیلئے خصوصی کارڈز بھی جاری کیے گئے اور بچوں میں تحائف بھی تقسیم ہوئے۔
علاقے کے لوگوں نے میڈیکل کیمپ کے اہتمام پر پاکستان رینجرز کے اقدام کو سراہا اور خراجِ تحسین پیش کرتے ہوئے مزید میڈیکل کیمپس کے انعقاد کی ضرورت پر زور دیا۔ رینجرز کا کہنا ہے کہ ہم عوام کی خدمت کیلئے میڈیکل کیمپس کا اہتمام جاری رکھیں گے۔
یہ بھی پڑھیں: گورنرسندھ نے کراچی پریس کلب میں فری میڈیکل کیمپ کا افتتاح کیا
