72سال سے کشمیری قوم بین الاقوامی برادری کے ضمیر جاگنے کی منتظر ہے‘شیخ رشید احمد

لاہور: وفاقی وزیر ریلوے شیخ رشید احمد نے کہا ہے کہ 72 سال سے ہندوستانی تسلط کے خلاف صف آرا کشمیری قوم بین الاقوامی برادری کے ضمیر جاگنے کی منتظر ہے،پانچ اگست کو ہٹلر مودی کے ہندوستان نے کشمیر پر دروباہ قبضہ کیا ہے۔

27اکتوبر کے دن کی مناسبت سے اپنے بیان میںشیخ رشید نے کہا کہ بھارت نے ایک کروڑ کشمیریوں کو عملاًقید کیا ہوا ہے۔ بین الاقومی برادری اپنی اخلاقی اور انسانی ذمے داریاں پوری کرے اورکشمیر پر ہندوستانی قبضہ ختم کرائے۔

شیخ رشید احمد نے کہا کہ پاکستانی قوم اپنے کشمیری بہن بھائیوں کے ساتھ کھڑی ہے اورہر فورم پر ان کی حمایت جاری رکھے گی،کشمیری قوم ہمت ہارنے والی نہیں ہے۔

انہوں نے کہا کہ ہندوستانی ظلم کی رات سے ایک دن آزادی کی صبح ضرور نمو دار ہوگی،شہیدوں کالہو ایک دن ضرور رنگ لا ئے گا ۔