عمران خان چین سے نہیں بیٹھے گا، خانہ جنگی اور بغاوت ہوگی۔شیخ رشید

اسلام آباد: عوامی مسلم لیگ کے سربراہ اور سابق وزیرِ داخلہ شیخ رشید احمد نے کہا ہے کہ چیئرمین پی ٹی آئی عمران خان چین سے نہیں بیٹھے گا، امپورٹڈ حکومت تسلیم نہیں کی جائے گی۔ خانہ جنگی اور بغاوت ہوگی۔

تفصیلات کے مطابق اپنے ایک بیان میں سابق وزیرِ داخلہ شیخ رشید احمد نے کہا کہ امپورٹڈ اور سلیکٹڈ حکومت کو پاکستان کے عوام تسلیم نہیں کریں گے۔ موجودہ وفاقی کابینہ میں شامل کیے گئے زیادہ تر وزیر  مجرم ہیں۔ ان پر مقدمات چل رہے ہیں۔

یہ بھی پڑھیں:

مئی کے مہینے میں استعفے دئیے اور لیے جاسکتے ہیں۔ شیخ رشید احمد

بیان میں عوامی لیگ کے سربراہ شیخ رشید احمد نے ن لیگ کے صدر شہباز شریف پر تنقید کرتے ہوئے کہا کہ جس پر فردِ جرم لگنی تھی، وہ وزیراعظم بن گیا۔ ہمیں پتہ ہے باپ کا باپ کون ہے۔ صورتحال ایسی رہی تو خانہ جنگی اور بغاوت ہوگی۔

چیئرمین پی ٹی آئی کے متعلق سابق وفاقی وزیر شیخ رشید نے کہا کہ عمران خان چین سے نہیں بیٹھے گا۔ عوام چوروں سے تنگ آگئے ہیں۔ کوئی بھی شہباز حکومت کو تسلیم نہیں کرے گا۔ 31 مئی سے قبل نئے انتخابات کی تاریخ کا اعلان کیا جائے۔ 

خیال رہے کہ اس سے قبل سابق وزیر داخلہ شیخ رشید کا کہنا تھا کہ مئی کا مہینہ ملکی سیاست میں ہنگامہ خیز ہو گا جس میں استعفے لیے یا دیے جا سکتے ہیں  جبکہ  ملک کے مسائل کا واحد حل الیکشن میں رہ گیا ہے۔

سماجی رابطے کی ویب سائٹ ٹویٹر پر2 روز قبل  جاری پیغام میں سابق وزیر داخلہ نے کہا کہ پاکستان میں اگلا مہینہ عید کے بعد ہنگامہ خیز ہو گا، پیٹرول اور بجلی پر آئی ایم ایف کے دباؤ پر سبسڈی ختم کرنے سے حکومت اپنی سیاسی قبر کھودے گی۔